Departamento di Agricultura, Cria y Pesca Santa Rosa keto bay ta sigui haya yamada di algun problema ainda cu tin cu nan fruta ta manera haya algun bichi na momento di cort’e. Manera entre otro den e fruta di guyaba esaki sa presenta. Pero e sa presenta tambe den otro frutanan. Esaki probablemente y den mayoria caso ta e musca di fruta. Manera semper nos departamento ta trata na tur manera cu ta posibel pa yuda na momento cu casonan asina ta presenta.
AKI TA SIGUI ALGUN CARACTERISTICA CON POR RECONOCE E MUSCA
E musca, tamaño di un Lebelebe, tin den su halanan manera un cabes di flecha geel. Su lomba ta mancha preto y su sanca ta strepia geel cu maron. Eynan, e hembra tin un pui di casca duro cu cua e ta staca abou di e casca di e fruta pa pone su webonan. Na Aruba a identifica 56 sorto di fruta manera mispel, guyaba, papaya, lamunchi, bacoba y mango, pa menciona algun, den cua e por pone webo. Dentro di dos pa tres dia e bichi ta sali for di e webo. Su curpa ta blanco cu cabes chikito. Despues di 6 pa 10 dia cu e fruta hecha y cay abou di e mata, e larvanan ta drenta tera pa pupa. Dentro di otro 6 pa 13 dia e adulto ta emerge di tera y na 3 dia mas e ta capas di pari y pone webo. Gran parti di e adultonan ta muri na dos dia di emerge di e pupa. Por lo general 50% dentro di dos luna. Algun adulto por sobrebibi te cu un aña.
SIMPTOMANAN DI INFESTACION
Fruta infesta pa musca di fruta tipicamente ta mustra puinan preto riba e casca. Depende di e sorto di fruta hende por mira cicatriz of hars na e puinan, mancha preto y deformacion di fruta debi na putricion. Mispel ta core un lechi blanco di unda e musca a pui e. Cierto mata ta produci fruta cu casca duro y otronan ta aborta fruta prome cu nan hecha. Bichinan, saca for di e fruta, poni riba un superficie plano sa bula den laira.
IMPACTO NUTRICIONAL
Fruta hecho ta bira inappeticibel, te cu hendenan por pasa pa comenan berde of stoba. Accion cu ta reduci e beneficionan nutricional cu fruta hecho ta ofrece. Di e impacto ecologico por bisa cu e musca ta un competidor directo pa e lebelebe y e por pone webo den dader di tuna.
CONTROL CULTURAL
Por medio di sconde frutan, cu ta na dos siman di hecha, den saco di papel por cosecha fruta fresco. Si hende tur dia piki tur fruta benta abou, hinca den saco di plastic, mara y pone den solo dos dia, ta evita cu bichinan por drenta suelo pa pupa. Tambe por duna na galiña of bestia di cria pa come. Falta di fruta pa 3-4 luna por minimalisa e populacion. Adulto recien emergi ta muri dentro cuater dia si no tin sap di mata of di fruta of honingdauw pa nan come.
Trata e tera bou di mata cu insecticida manera Diazinon, chlorpyrifos of fenthion ta caba cu e pupanan. Spinosad, GF-120 ta un insecticida comercialmente disponibel.
Manera ta conoci si ya pa algun aña caba nos departamento di Agricultura, Cria y Pesca Santa Rosa no ta disponi mas di pesticidanan cu ta causa daño na nos medio ambiente. Claro di nos banda mester conseha kico por yuda controla of caba cu e plaga aki na momento cu bo haya bo den situacion asina. Tin metodo natural cu por yuda caba cu e plaganan aki tambe. Pero esey ta keda na cada ken pa dicidi cua di e metodonan aki e lo desea di uza.
