Mi no ta kere Miguel Mansur cu Aruba tin un problema directo pa cu matrimonio di mesun sexo. Bo persona mester tin un postura politico mas respetuoso pa ful pueblo di Aruba, paso Aruba ta nos tur cu nos diferencianan social, politico, religioso etc. Bo ta un representante di pueblo. Esaki ta conta tambe pa e politiconan di partido RAIZ y cualkier otro politico cu ta lubida ken tur nan ta representa.
Defende un punto of den e caso aki un ideologia di genero, no kiermen cu por ataca por ehempel parlamentario Rycond Do Nacimento di AVP, ataca parlamentario Berlis di actual gobierno of dominee Peter Hazenoot di Iglesia Protestant of otro di e otro religionnan den un forma cu ta fomenta rabia di un pa e otro, djis pasobra nan no ta comparti bo mesun opinion riba e tema aki. Lamentablemente esaki door di diferente ciudadano di nos isla tambe. Como representante di pueblo bo tin e tarea di para pa derecho di libertad di tur y no pa un solo banda y teniendo na cuenta te ki punto esaki ta bay man den man cu obligacion y limite tambe.
Na Aruba, mayoria di nos tin den famia un ser stima cu e mesun ideologia cu bo persona, maske cu pa otro ta mas facil y pa otro mas dificil, como famia ta acepta y stima nan, a pesar di nan diferencianan di opinion. E problema cu a pone masha hopi hende rabia ta cu algun persona a dicidi den forma dictatorial di cuminsa impone e ideologia aki den enseñansa basico. Aruba completo por a mira con un docente ta impone esaki na mucha cu tin nan propio famia y nan propio educacion na cas pasando riba autoridad di tur mayor. Esaki sin cu e ley a pasa ainda, imagina si el a pasa.
Con e pastoornan ta wordo ataca personalmente y menasa di morto, y con boso ta expresa di e fe cristian. Nan tambe tin libertad di religion. Pero asina a refleha un biaha mas e imponencia autoritario cu kier pa iglesia acepta un ideologia riba e realidad biologico, cientifico y genetico cu nan tambe ta defende, y hopi ta sostene. Di mes bo lo haya hopi hende cu mirando e actonan aki no lo para pa cu matrimonio aki.
Mansur ta lubida cu matrimonio ta un sacramento, instrui door di palabra di Dios den bijbel cu e proposito cu matrimonio ta e cuido y proteccion di nos muchanan y pa e comunion, bienestar y bendicion di Dios pa cu e pareha. Esaki ta e motibonan cu logicamente misa of religion tambe lo defende nan Santo Sacramento y nan famianan completo cu ta para tras di esaki. Hasta si casa pa civil, pasobra e concepto ta keda e mes un, djis aproba cu e leynan di mundo.
Esaki ta bay mas leu tambe, tin hasta e atheonan cu a pesar nan no ta kere den un Dios, nan ta kere den famia consisti door di un hende muhe y un hende homber. Kiermen, semper lo bay tin debate over e tema aki di diferente area. E diferencianan aki por wordo discuti cu argumento nan di caliber, mas no fundando rabia. Bo persona ta apoyando pa fomenta un rabia cu aki na Aruba no ta existi pa medio di atake na persona cu otro pensamento di e ideologia di genero.
Corda cu Aruba ta un comunidad chikito. Ey for tin un mundo gigante unda un cantidad di e paisnan ta bira e refleho di ora nan acepta matrimonio di mesun sexo pa mustra cu nan no tin nada contra. Pasobra na final ta nan bida pero esaki no a keda ey. Nan ta bay exigi mas y mas sin control, unda ta papia di igualdad pero te hasta baño di genero ta existi, unda kier kita e sexo cu ta defini un baby. Ta impone e leynan den tur area na beneficio di e ideologia aki sin tene cuenta cu derecho dje otronan. Ta castra e muchanan sin cu nan a bira adulto y kitando un mucha su derecho di dicidi pa su mes na un edad adulto y consciente.
E miedo aki no tabata sin mas ni menos, esaki a wordo demostra cu e ponencianan cu mi a menciona caba. Pa colmo a wordo reforsa cu e pensamento di habri mente di pueblo di Aruba cu invitacion di un barco di turista completamente gay. Esey no ta e problema of e polemica cu el a crea, pero ta e forma con aki na Aruba nan kier a frega den cara di pueblo cu e ideologia aki no ta solamente uno cu ta busca igualdad y respet. Pero uno cu kier impone e actonan cu no ta aceptabel bao di ningun genero.
Mas cu claro no por bisa cu ta tur, pero locual mayoria ciudadano a experiencia riba nos isla ultimo, tabata un sentimento di burla pa cu e resto di comunidad y nos muchanan. Tur hende por pasa bon, sea ta baila of hasta mea mes. Ken na Aruba nunca a bay sali y pasa pret? Pero tin un limite pa tur genero en general, sin importa nos preferencia- of gustonan sexual; tur cos tin un limite.
Na Aruba mayoria di hende no tin problema cu ken bo kier casa, e problema ta ki imponencia lo bay bin despues riba tur esunnan cu no ta pensa mescos. Kico ta warda nos yiunan cu diferente cultura, religion y educacion propio di cas? Mas cu claro tin cu ta apoya e union aki pero tambe tin hende cu a firma y lo firma pa matrimonio aki no bira uno legal mirando tur reaccion y actonan cu tin tras di esaki.
Tambe mester tene cuenta cu otro tema cu e percepcion cu tin actualmente aki na Aruba tocante varios tema di LGBTQ+. Esakinan no ta bay pasa e realidad cu ta supera cual kier discurso ideologico. Esakinan tambe ta e debatenan mundial, unda awe tin varios scenario lamentabel. Por ehempel door di a cambia nan sexo, hopi suicidio ta tumando luga despues di a bay tras di nan ideologia cu na final no a yena nan como ser humano y a realisa cu nan a haci un gran eror.
Tin e problemanan medico unda cu door di e ideologia aki ni a bisa dokter cu nan ta originalmente cierto sexo y nan a perde nan bida. E dokternan mundialmente ta pleitando pa e ideologia of comportacion di pretende bo ta un sexo pero no ta asina, no drenta area di medicina, esaki ta bay contra e anatomia humano biologico y genetico. Esaki ta locual nan a studia p’e y nan no kier perde un pashent pa falta di sensates di con un persona a nace. Por ehempel; un persona ta drenta kantoor como hende muhe sin bisa dokter e realidad. Pa ora nan kier bisa dokter ta laat pa por a constata un cancer di prostaat terminal. Dicon? Pasobra dokter no a haci e test di prostaat aki, pasobra ta un muhe cu identidad muhe a drenta su kantoor, y di mes dokter no lo mand’e haci un test di prostaat na un muhe. Pasobra nos hende muhe no tin esaki. Asina tin mil otro ehempel. Esakinan ta e temanan cu hopi tin miedo si aproba un matrimonio di mesun sexo.
Mayoria di nos aki na Aruba tin famia, amigo, conocir di e grupo LGBTQ+ y algun cu hasta a casa afo y nos ta stima y respeta nan, a pesar di nos diferencianan di opinion. Pero di mes un forma nan ta respeta otro y kisas e grupo aki por ta ehempel cu por biba den comunidad sin fomenta odio, specialmente odio religioso/ spiritual pasobra tambe tin hopi cu ta kere den un ser di luz superior na nos tur cu ta duna nos e chens di lanta mainta y hala rosea. Mi tin hopi conocir, bon amiga y amigo cu ta gay hasta pasa pret, balia, tenta otro etc., pero respetando e limite di cada un di nos.
Tin orguyo LGBTQ+ pero tin orguyo di un Dios tambe. Corda cu nos derechonan tambe tin obligacion. Un ta paso bo ta pertenece na orguyo LGBTQ+, kiermen cu bo tin derecho y ta perde bo obligacion. Un ta paso bo ta heterosexual bo tin obligacion pero ta perde bo derecho.
