Faltando dos dia ainda prome cu entrega lista pa participa den eleccion parlamentario di dia 25 di juni 2021, ainda San Nicolas no tin number pa su candidato. Minister Chris Romero, candidato # 3 riba lista di partido MEP den eleccion di september 2017, a logra no menos cu 1048 voto riba su nomber. El a resulta di 6 votegetter den MEP.
Despues di cuater aña di dedicacion y trabou intenso, awor cu ta momento di eleccion, ta evaluando cambio interno. Remarcabel ta cu den e top 4 no a haci cambio entre Wever, Maduro, Oduber y Croes, sino a limita e cambio na Romero exclusivamente.
Su sostenedonan y coordinadornan, pero specialmente su votadonan di San Nicolas no a aprecia e cambio aki. Mas bien ta considera esaki un bofta den nan cara, net di e partido cu historicamente a “struggle” pa por crece pariba di brug. Awo cu nan tin un representante di e districto, awo kier hal’e un banda pa acomoda otronan di pabou di brug, cu no necesariamente ta drumi anochi “uptown”.
Chris Romero ta un maestro di scol conoci y masha stima di y na San Nicolas. E tin basta aña caba ta milita riba lista di MEP y a ocupa funcion den parlamento y awo como minister.
Entre awe y mañan lo mester tuma decision riba e lista definitivo di partido MEP. E decision final ta den mannan di Evelyn Wever-Croes como lider di e partido politico. San Nicolas ta spera cu lo no laga nan na caya, pasobra nan ta cu Chris!
