Pa San Nicolas tin movecion, placa mester draai. Mario Croes, kende ta forma parti di e directiva nobo di San Nicolas Business Association, a splica cu ta conciente cu esaki ta un plan pa e proximo 10 pa 15 aña.
Loke cu nan kier cuminsa cun’e, cual a expresa na prome minister den un reunion, cu banda di e pensamentonan cu a trece dilanti, tin algun punto di accion cu tin cu sosode awor aki.
Uno ta pa bin cu un City Manager pa San Nicolas. Den pasado sr. Andres Hernandes, kende tabata presidente, tabata dedica mucho tempo na bel pa duna keho por ehempel di camindanan kibra, luznan di caya grandi cu ta kima, matanan descuida. Trabao basico di servicio publico, no ta tumando luga y pesey kier un City Manager.
Tambe, e noticia cu a bin cu no por bin un MFA na San Nicolas pasobra e placa di gobierno a wordo gasta na un otro meta door di e gobierno anterior, e ora ta bisa cu no kier un MFA. Pero haci un fabor pa digitalisa Bestuurskantoor e ora. Si digitalisa e servicionan di gobierno, bo no mester e ora bay para den rij. Mita di e poblacion por haci’e online. Si ta pidi pa upgrad’e.
Di tres cos cu a pidi ta, pa bin cu un autoridad, un downtown San Nicolas Authority, mescos cu tin Aruba Ports Authority, Aruba Tourism Authority, kier bin cu un autoridad, si e plan cu propone wordo acepta pa gobierno, e ora e autoridad eynan ta wordo encarga pa e wordo maneha. A bin cu un paar di punto basta concreto.
Refineria
SNBA ta masha precavido pa haci un expresion riba e refineria. Loke ta bisa ta cu no sa di e mercado mundial, no sa di e situacion di Venezuela. Pero si en caso e wordo rehabilita, ta pidi pa e bin cu filter y scrobbers, pa e no saca sushi mas riba e comunidad di San Nicolas.
Efecto
E efecto sigur a wordo sinti 100%. Esey ta loke e comerciantenan di San Nicolas ta bisa SNBA. Tin e contratistanan, pero tambe tin esnan cu tin restaurant, etc., ta sintiendo e efecto. Atrobe, nos ta un pais chikito den mundo. E importante ta si, cu e desaroyo di Aruba, por bisa historicamente, el a wordo determina door di factornan cu no tabata den nos man. E refineria a bin pasobra tabata in situacion na Venezuela y nos tabata tin un waf, nan a dicidi pa bin aki. E hotelnan a bin, pasobra nos tin beachnan bunita, nos ta pafo di e ruta di horcan, y e hotelnan a bin. No ta algo cu nos a diseña y bisa pa bay traha beach of waf.
Nos tabata tin’e caba. Awor nos a yega na un punto cu nos mester bay diseña nos pais, nos mester diseña nos economia. Esey ta diferente cu loke nos a experencia te awor aki. Esey ta bay rekeri un otro manera di pensa cu nos tin cu wak nos pais como un empresa cu tin cu bay produci balor pa nos por haya placa pa duna nos pueblo di come y duna nos pueblo di biba. Esey toch ta un cambio di pensamento, segun Croes.
