Profesor Ryçond Santos do Nascimento ta hopi agradecido pa e apoyo cu el a bin ta ricibiendo for di studiantenan di Universidad di Aruba.
El a splica cu na 2016 el a promoveer y el a wordo recomenda pa haya e puesto di “Hoofdmedewerker” na Universidad di Aruba. Pero e Rector a wanta e proceso aki den henter 2017, pa cual el a dicidi di solicita pa un puesto similar cu no tabata igual cu e tema riba cual el a “promoveer”.
Pa esaki tabatin e entrevista di solicitud dia 24 october, pero e Rector a cambia e “functie-eisen” dia 7 di november. Pues a hisa e exigencianan pa e posicion, pero di un forma cu ningun hende eynan lo cumpli cu esakinan. Ni esnan cu ta ocupa e funcion aki den e diferente otro facultadnan. El a dicidi di keha e asunto na College di Curator, pero nan no a haci nada pa esaki. Na mei, 2018, el a entrega un keho cerca Minister (Constitucion ta dun’e e derecho aki).
E ta haya cu Universidad a purba di tur forma pa stroba su persona pa promove y stroba un proceso husto na Corte. Na januari, 2018 a bay LAR pero no a haya e documento sino te na luna di mei, den cual ta comproba claramente cu e exigencianan a wordo cambia.
E mes tabatin diferente combersacion cu Minister encarga y segun do Nascimento ta bisa, niun momento el a haya e impresion cu e mandatario tabata presionando Universidad pa tuma un decision. Si e Rector tabata presion’e pa tuma distancia for di partido AVP. Pero el a bisa e instituto na diferente ocasion, cu ta su derecho Constitucional esey ta. No tin nada cu ta strob’e di afilia su mes. Loke si no por ta cu e instituto no por tin un color politico. Unico cos cu por exigi di dje como miembro di Facultad ta pa e no tin “neven activiteiten”. “Nos pais tin un estado di derecho democratico y esey ta para den Constitucion,” el a bisa.
