“E pueblo cu ta logra uni su ambicionnan, su sentimientonan y ideanan ta encontra un destino y un mision pa lucha p’e: un causa comun. Aruba tin mester di un causa comun; nos mester lanta cu fe y determinacion pa realisa un miho Aruba, un Aruba mas fuerte cu nunca, un Aruba cu ta crea e posibilidad pa felicidad den cada hogar.
Esey ta nos causa comun”, asina e docente universitario mr. dr. Rycond Santos do Nascimento a splica di e mision cu entre otro e instituto cu e ta dirigi, Fundacion Digna Lacle-Herrera, a acepta como e reto presenta dor di Lider di Partido AVP, mr. Mike Eman na dje y Fundacion Digna Lacle Herera, Fundacion Mito Croes y Plataforma Hobennan profesional (PHP) pa den un proceso di consulta nacional yega na un Plan di Rescate pa Aruba.
Mr. dr. Rycond Santos do Nascimento ta splica cu bos y pensamento di comunidad ta importante na e momento crucial aki pa Aruba. Esey ta haci un proceso di democracia participativo mas necesario cu nunca. “Bo bos y bo pensamento mester ta base pa un ambicion comun pa futuro. Bo voz y bo pensamento mester ta e fuente di un reflexion nacional cu lo conduci na un plan integral. Democracia ta exigi cu nos hendenan ta brainstorm riba e rumbo di nos pais y riba e pasonan pa garantisa un futuro mas feliz di nos comunidad”, el a enfatisa.
Na momento cu logra conecta e necesidadnan y e aspiracionnan den un Plan pa Futuro y na momento cu ta confirma nos compromiso cu un Plan di Rescate, nos ta libera e poder pa haci cambionan transcendental pa Aruba. Historia a demo
stra cu ora pueblo logra vincula su ambicion, por eleva nos mes na un nivel mas halto y supera tur obstaculo, e professor constitucional a accentua.
Lider di AVP, mr. Mike Eman hunto cu institutonan Fundacion Digna Lacle-Herrera (FDLH), Fundacion Mito Croes (FMC) y Plataforma Hobennan Profesional (PHP) ta anuncia Diahuebs anochi 7’or e proceso cu e partido lo encamina hunto cu e institutonan pa yega na un plan integral di recuperacion pa Aruba.
