Presidente Vladimir Putin a anuncia diahuebs madruga cu Rusia ta cuminsa cu un operacion militar den parti oost di Ucrania. Segun Putin pa proteha e pueblo di “abuso y matamento” cu gobierno di Ucrania a bin ta comete pa ocho aña largo. Algun minuut despues por a mira imagen di varios ciudad bou atake. A raporta explosion den Kharkiv (e di dos ciudad mas grandi), Mariupol, Kramatorsk y Kyiv cu ta e capital di Ucrania.
Diferente lider rond mundo a condena e atakenan. Presidente di Merca Joe Biden a keda di anuncia un cantidad nobo di sancion contra Rusia den cooperacion cu varios pais aliado. Minister-president Mark Rutte a tweet di ta “den contacto estrecho cu NATO (North Atlantic Treaty Organization) y Union Europeo” ademas a condena e atakenan profundamente.
Volodímir Zelenski, presidente di Ucrania a declara estado di emergencia pa 30 dia, a cera su espacio aereo completo y aeropuerto ta completamente evacua. Riba e rednan social por a mira diferente imagen di varios ciudadano ta bandona Kyiv cu auto, mientras ta scucha y mira explosion den fondo.
Nacionnan Uni a yama un reunion di emergencia unda varios embahador den e Conseho di Siguridad a condena e agresion di Rusia contra Ucrania. Sergiy Kyslytsya, embahador di Ucrania pa Nacionnan Uni den un rueda di prensa a bisa cu “Rusia a declara guera contra Ucrania” y urgi pa tur nacion para firme contra e violacion di Ucrania su independencia.
Na su turno Vassily Nebenzia, embahador di Rusia pa Nacionnan Uni a hustifica tur accion di su pais y cu Rusia no tin intencion pa ocupa Ucraina. Rusia a cera tur aeropuerto y su espacio aereo parti zuid di e pais. For di Belarus a mira varios tropa ta crusa frontera. Atake tambe a bin for di e region di Crimea. Den e ciudad capital di Ucrania, Kyiv por a sucha sirena y hende a bay sconde bou tera den bunker of tunel di e metro; algun otro a core bay haci respondi na supermercado.
“E republicanan popular di Donbaas, Luhansk y Donetsk a haci peticion na Rusia pa yudansa. Debi na esaki a tuma decision di realisa un operacion militar special cu obhetivo pa proteha tur persona cu ta victima di abuso di e regimen di Kyiv. Nos ta busca pa elimina tur elemento militar di Ucrania” presidente Putin a remarca den un discurso nacional riba television.
Despues di un pandemia di dos aña awo mundo henter ta en espera di por tin un fin na e conflicto arma entre Ucrania y Rusia.
