Dia 5 di october 2022 tabatin sentencia den corte cu un trahado di limpiesa a entama contra SKOA. “E trahado ta miembro di SEPPA y e sindicato a busca mi abogado, mr. E.E. Rosenstand, kende ya a gana dos caso contra SKOA pa loke ta e asunto di werksters.” Tur hende ta corda con a tilda ex-minister Lampe di ta anti werkster, anti sindicato, anti SKOA. Pero awe pa di tres biaha hues ta bisa cu SKOA ta wrong, y nos tur sa wrong and strong.
SKOA contra ley y riba su mes a cuminaa paga for di 2015, e trahadornan di limpiesa como si fuera nan ta ambtenaar. Ex-minister Lampe a mustra SKOA cu ningun hende ta para riba ley y e huesnan a dun’e razon dos biaha caba y toch SKOA a keda actua contra ley. Prome minister Evelyn Wever-Croes a priminti SKOA cu e si lo fix esaki, dos dia prome cu eleccion. Minister nobo di Educacion, Endy Croes, a bisa cu e lo regla esaki den 30 dia di gobernacion nobo. Wel un aña a pasa y ni minister-president ni Endy Croes por a regla nada, y SKOA a bay over na corta e salario di werkster segun status di ambtenaar y paga e salario conforme ley.
Wel mundo ta dal buelta. SEPPA cu tanto a pinta ex-minister Lampe como e boeman contra e werksters, ta pidi abogado di ex-minister Lampe pa defende e werksters. Hues awe ta dicta na fabor di e trahado di limpliesa, cu e tin verworven rechten, y cu SKOA mester keda paga e werkster e salario di for di 2015 y no por corta unilateralmente den e salario. SKOA ta e dunado di trabao y no gobierno. Kiermen SKOA, segun e sentencia mes ta menciona, lo mester bay aumenta e schoolgeld pa por cubri e extra gasto aki. Ya cu gobierno, esey tambe ta para den e sentencia, a comunica na SKOA cu gobierno lo subsidia conforme e sentencianan cu ex-minister Lampe a gana, esta conforme ley. Pues SKOA tin cu scupi awor e restante, mientras cu SKOA caba tin solamente na belasting so, segun ta para den e sentencia, un debe atrasa di riba 5 miyon. Kiermen SKOA su problema financiero a bira pio despues di e sentencia di 5 di october.
Si SKOA dicidi pa kita e trahado pa e motibonan economico (SKOA a bisa hues cu e lo mester kita 30 trahado di limpiesa) e ora den e siguiente 6 luna e no por contrata otro werkster sino esun cu a kita fo’i trabao. Si e kita nan toch e ora e no por cumpli cu limpiesa di scol y e ora inspectie lo raporta cu SKOA ta viola e tres Landsverordeningen di peso en cuanto educacion. Kiermen SKOA a hinca su mes den un hanchi sin salida dor di gasta placa di pueblo contra ley. Y esey mi a spierta SKOA pa su mesun bon pa e coregi e situacion. Pero no, maestro, trahado, sindicato hunto cu SKOA a manifesta na tur scol y a bay bisti na preto contra ex-minister Lampe. Awe e realidad ta dal den nan cara cu nan a perhudica nan mes.
Mi tabata testigo con SKOA a humiya mr. Rosenstand y awe e abogado den nan wowo mediocre aki ta gana SKOA den corte pa di tres biaha. Driemaal is scheepsrecht. E directiva di SKOA, Raad van Toezicht y Bestuur, mester entrega nan retiro, pasobra e crisis financiero aki di SKOA lo hiba e docente-, trahado- y mayornan den un abismo. SKOA ta practicamente bancarota. Ta dos caminda e tin y tur dos ta inhusto. Hisa schoolgeld ta inaceptabel, no por laga e mayornan paga pa e mal maneho di SKOA. Hisa subsidio di gobierno tambe ta inhusto, pakico hinca placa di pueblo pa tapa mal maneho di SKOA. For di 2018 mi a propone un solucion pa e no tin cu yega asina leu, pero ni SKOA, ni minister president, ni Parlamento, ni sindicato kier a scucha.
