Un caso lamentabel y hopi doloroso a tuma luga awe mainta na un crèche na Bloemond Paradera, caminda un baby di seis luna a bira malo y a transport’e cu urgencia cu ambulance pa hospital.
Informacion cu a ricibi for di autoridad, ta cu e criatura aki lo a bira malo na e crèche. E personal encarga lo a tuma contacto na prome instante cu 911 y aki ambulance a presenta. Un rato despues a informa demas autoridad di locual tabata tumando luga y a presenta pa asina tuma tur dato.
Na prome instante a specula cu algo lo a bay robes na dicho crèche, cu por tin indicacion riba posibel stikmento cu lechi pero informacion oficial ta indica cu e baby lo a muri di causa natural. Den careda di 6:43 PM dokter a constata morto di e baby Elizienne E. De Cuba, di apenas 6 luna di edad. Ta papia di un posibel: Aspiratiepneumonie (verslikkingspneumonie)
Algo cu ta pasa basta frecuente, caminda cu parti chikito cu ta den e boca (cu por ta cuminda, likido, un of otro material of scupi) ta drenta canal robes y ta pasa bay den e luchtpijp (e canal respiratorio), conoci tambe ora nan bisa bo a “pasa robes”. Gran mayoria di biaha e mecanismo normalmente lo rechasa locual a drenta y ta busca manera pa saca esaki di su mes, por ehemple door di tosa.
Centro di Cuido Moises
E crèche aki ta situa riba caminda principal di Bloemond, Bloemond 24-B na Paradera , specialisa riba kingeropvang y peuterspeelzaalwerk bou di directora Anuschka Rosita Abigael Geerman-Kelly. Te na e momento aki, no tin un declaracion di parti di e crèche kico ta locual a tuma luga te na momento cu a transporta e criatura pa hospital.
Mayornan di Elizienne E. De Cuba
Un noticia hopi tristo, un dolor hopi grandi pa henter famia sigur cu un perdida di un ser asina precioso cu ta un criatura cu apenas a cuminsa biba. No sa si e criatura lo por tabatin cualkier condicion medico of tabata sufri di un of otro enfermedad cu lo por a conduci na e morto repentino di nan criatura.
Comunidad un biaha mas tambe ta uni nan mes den momento di tristesa aki pa e famia, for di mainta ta pendiente si acaso e por a recupera ainda pero lamentablemente un rato pasa vocero policial a manda e informacion oficial cu e criatura lo a fayece na hospital despues cu a kit’e di mashin.
Headlines Group ta manda palabra di mas sincero condolencia na e mayornan di e criatura Elizienne E. De Cuba. Cu e descansa na paz
