“Pa cuminsa mester subraya e echo cu diversificacion ta sigui ta importante pa Aruba”, asina Ronella Croes, CEO di Aruba Tourism Authority, a duna di conoce durante un entrevista na Peru. E ta den pleno preparacion pa yegada di e vuelo inaugural diasabra awo for di Lima, cu LATAM Airlines.
Meta di habri mas mercado ta sinta na diversificacion. Ta conoci cu si algo sosode na Merca, semper ta bon pa tin un balansa for di unda e bishitantenan ta bin. Ta pa e motibo ey mes a sigui insisti y traha riba e mercado di Latino America.
Si wak atras durante e periodo di aña 2014 pa aña 2024 por mira un averahe anual di crecemento di 23% for di Latino America na momento cu exclui Venezuela. ATA ta continua cu su strategia den un forma consistente.
Ronella Croes tin un Master Degree den Business Administration di Hogeschool Saxion na Enschede, Hulanda y University of Lincolnshire and Humberside. El a traha den mercadeo na un compania di telecomunicacion, tabata director di Tourism Corporation Bonaire y desde 2011 ta na cabes di Aruba Tourism Authority.
Tin diferente motibo pa cual ta opta pa Latino America, por ehempel e mercado Chileno ta gasta un averahe mas halto compara cu otro mercadonan pues nan tin un impacto economico. E pasaheronan Argentino ta keda un averahe mas largo compara cu e promedio di Aruba cu ta nuebe anochi, pues nan tambe ta causa un impacto economico. E mercado di Peru, 25% ta opta pa ripiti nan bishita pues tambe tin un impacto economico. E Brasilero ta representa un mercado cu ta gasta mas y nan patronchi di gasto ta diferente. Tin diferente motibo strategico cu ta mara na e impacto economico.
E strategia pa e aña aki ta pa book un resultado cu lo ta uno record pa e mercado Latino Americano cu ta un total di 116 mil bishistante, esaki ta e cantidad cu ta spera di cera e aña cu ne. ATA ta spera di por aumenta e cifra na 125 mil pa otro aña. Ambos cifra ta representa un cifra record cu no a yega di mira prome pa e mercado di Latino America. Pa siguiente aña e strategia lo ta mas dirigi riba e paisnan di Chile, Peru, Argentina y Brasil. Pa ATA esaki ta e mercado long haul, mirando cu ta tuma un poco mas pa yega. Sin duda, tin diferente atributo di mercadonan aki uno importante pa Aruba.
LATAM ta un aerolinea clave pa yuda ATA pa logra meta. Ta algo cu nan ta bin ta trahando riba dje pa alrededor di 10 aña y awo finalmente a keda cla cu ne. E frecuencia cu lo introduci lo representa un fit tremendo pa por pusha y logra cu e mercadona ya caba menciona. Colombia ta un mercado primario den Latino America y e ta sigui ta importante cu ATA kier mira un crecemento.
Hopi esfuerso hinca pa loke ta trata turismo na Aruba. ATA a pone un presupuesto mas eleva pa 2024 compara cu 2023. Esaki ta traduci den diferente campaña cu LATAM Airlines y diferente otro aerolinea den e mercado y cu ta ampliando frecuencia. E mercado cu ta di grupo incentivo, cu ta lucrativo pa Aruba, ta keto bay atrae e mercado aki for di Latino America.
