“Pa Aruba Tourism Authority ta un placer pa ta e anfitrion di un celebracion asina importante manera esun di awe, danki na e embahador pa comparti bo residencia cu nos awe”, asina Ronella Croes CEO di ATA a cuminsa cu su discurso durante e evento pa celebra 40 aña di presencia di Aruba Tourism den e mercado Colombiano.
Dia 24 di mei oficina di turismo di Aruba na Colombia ta celebra 40 aña di existencia. E ta un oficina cu tabatin varios reto grandi durante su historia. Ronella Croes, CEO di ATA, a recorda con algun aña atras e promocion di Aruba na Colombia tabata “e riesgo ta cu bo kier keda” y esaki ta mas cu berdad!
ATA a keda y ta kere den Colombia, un pais caminda relacion comercial y economico, di salud, di turismo y alabes cultural pasobra hopi di nos hendenan ta ascende di famia Colombiano y nos por mira esaki den e tradicionnan cu nos a tuma como di nos mes manera e cuminda, amor pa musica Colombiano y e idioma.
Colombia ta un mercado cu reto, cu a haci nos mucho mas creativo den e desaroyo y implementacion di strategia. E ta un pais cu a habri e caminda pa e demas paisnan den Sur America y esaki a pone cu a crea relacion cu e socionan cu ta move den e mercado Colombiano y Latino Americano.
Desde 1980 te cu december 2022, mas cu 700 mil turista Colombiano a bishita Aruba. E cantidad aki ta representa un 3% di e 27 miyon di bishitante Latino Americano cu Aruba a yega di yama bonbini. E cifranan aki ta importante pa ATA pasobra Colombia a sigui aporta cu biahero pa Aruba, maske cu tabata den un grado menor na e demas paisnan den region na momento cu e tabatin limitacion cu Visa Schengen pa Caribe cu a implementa na 2003.
Durante e periodo ey te cu e eliminacion di e visa na december 2015, Colombia tabata aporta activamente na un promedio di 15.300 pasahero pa aña. Como parti di e strategia global, desde algun aña caba Aruba a enfoca pa apoya sostenibilidad di turismo pa medio di pasahero di nivel halto, cu ta genera masha poco impacto den Aruba su recursonan natural, cu no ta afecta e calidad di bida di e localnan y cu tin un experiencia fantastico riba nos isla pa asina nan bolbe bek.
Na 2022 Aruba a ricibi 1.170.000 turista di calidad y 37 mil tabata procedente di Colombia. E cantidad aki ta representa un 3% di e mercado global. Durante e aña aki (2023), ATA lo sigui traha activamente den e recuperacion di turismo, yegando na un recuperacion di 105% compara cu aña 2019, un di e añanan record prome cu pandemia.
