“Cu e vuelo inaugural di awe nos ta habri un capitulo nobo”, asina Ronella Croes, kende ta e Chief Executive Officer di Aruba Tourism Authority (ATA) a cuminsa su discurso na ocacion di yegada di e vuelo inaugural di LATAM Airlines diasabra atardi na Aruba. Ta despues di mas cu 30 aña cu Aruba ta conecta bek cu Peru y ta prome biaha den historia cu esey ta sosode cu un buelo directo non-stop, sin pasa otro destinacion prome. ATA, siendo parti di e ekipo cu a logra esaki, no por a sconde nan felicidad y orguyo cu e vuelo aki.
“E logro aki no tabata uno facil. E ta refleha trabou consistente di mas cu 10 aña”, di acuerdo cu Ronella Croes. E vuelo a yega yen diasabra y e benta pa Aruba ta fuerte, si tuma nota di resultadonan te cu awo, for di december pa maart 2024. “Nos ta satisfecho y LATAM Airlines ta satisfecho y manera e CEO di LATAM Airlines a remarca .. no por descarta cu nos lo por ta ampliando e vuelonan pa vuelonan diario”.
“Pa nos e ta un honor pa por sigui sirbi nos pais, e ta un satisfaccion grandi di por cumpli cu nos tarea principal, cu ta: trece e beneficio economico optimal pa medio di turismo. Un beneficio cu mester traduci su mes den bienestar pa e comunidad y cu ta brinda oportunidad pa esnan concerni inverti netamente den esaki”, asina Ronella Croes a enfatisa, subrayando e echo cu turismo ta e unico pilar economico di nos pais na e momento aki.
“Aruba, nos ta para dilanti di un otro logro grandi pa nos industria di turismo, ofreciendo un caluroso bonbini na LATAM Airlines. Cu esaki ta habri un capitulo nobo y e inicio di un relacion estrecho entre Peru y Aruba. Ban keda demostra y comparti e hospitalidad y amabilidad pa cual nos ta conoci p’e! Y haci di e logro grandi aki otro exito rotundo di nos hendenan como parti di nos DNA. Ban nos tur keda anima pa sigui traha na bienestar di nos isla, pa asina nos keda logra cosnan grandi pa nos isla”.
