Ya den e dianan cu ta tras di lomba, dianan liber, fin di siman, etc., por a mira basta movecion rond di ilegalidad y tambe criminalidad riba nos isla. Parlamento tambe tin un rol importante pa haci nan parti pa entre otro atende cu leynan y tambe atende cu diferente cos cu por obliga of pone gobierno duna atencion na e problema serio cu nos tin entre otro, entrada di ilegalnan riba nos isla.
Ex inspector di polis, Robert Candelaria ta forma parti awo di fraccion di AVP den Parlamento. E tambe a sigui tur desaroyo den fin di siman y asta diamars, entre otro.
El a splica cu e fin di siman aki a mira cu hopi cos a bolbe tuma luga, cu ta cosnan hopi lamentabel. Pero den tur e cosnan malo cu a pasa, por mira e cosnan bon tambe. Pesey el a sali bisa y duna un palabra di pabien na e polisnan cu a traha asina bon den e fin di siman aki, tumando riesgo pa nan mesun bida y bayendo e extra mile pa a logra gara hendenan cu ta bezig ta planta marihuana cu nan laboratorio y tambe hendenan civil, cu a subi lama y yuda esnan cu a accidenta. Ta lamenta profundamente cu un persona a perde su bida. A gosa di mira cu tin ciudadanonan cu a sali y duna un man y yuda salba bida.
E fin di siman aki ta pone pensa riba algun cos tambe. Tin cierto decisionnan cu awor aki minister mester tuma. No tin tempo mas pa papia, pensa, delibera y un di nan ta patruya nos costanan. Y no solamente un servicio. Nos tin polis, tin douane, tin kustwacht. Nan ta coexisti pa añanan largo. No ta algo cu tin cu inventa. Pa fin di aña, nan a haya algun vehiculo nobo pa haci exactamente e trabao ey, cual ta patruya nos costanan, pero te dia di awe no ta tumando luga. Awor aki minister mester mustra liderasgo y bisa pa tal fecha, y si ta pa fraccion di AVP, e cuminsa di biaha, ta cuminsa forma un ekipo, consistiendo di polis, douane y kustwacht y ta cuminsa patruya nos costanan di un forma sistematico.
Por a mira den fin di siman, cuater granada di man, hopi ilegal ta subi tera. Un handgranaat por imagina pakico nan ta bin cun’e. No ta pa nada bon. Esaki por duna un indicacion di loke ta drentando, sin cu ta wordo gara. A gara un biaha cuater. Tremendo trabao. Pero cuanto di nan no a drenta caba. Con nos situacion di siguridad ta. Awor aki no tin tempo mas pa pensa, traha plan. Awo ta tempo pa tuma decision, ehecuta cosnan. Un cos mas cu candelaria tin cu haci urgente, ta di ilumina e area unda cu nos ta mas vulnerabel. Pone luz, Baby Beach bay p’ariba. Traha den scuridad y traha den luz ta haci un diferencia. Luz ta algo preventivo. Awor aki mester hinca extra kosten den esaki. Por mira con e situacion ta birando na Venezuela. Dia pa dia e ta birando mas grave. No mester warda, manera cu por mira na Colombia, cu gran cantidad di hende ta crusando frontera bay Colombia. Nos no mester warda pa e yega asina leu.
Awor aki tin cu percura pa e tres islanan cu tin aki, ABC, pa den todo caso Aruba, ta un isla no ta atractivo pa bin pa un persona ilegal. Ora cu pensa, miho nan bay Colombia of otro caminda, pero no Aruba. Con pa haci’e? Cu bon patruyahe, cera frontera, pone luz, pone control, fix e asunto di radar. Awor aki ta momento di actua y no pa pensa y planea mas.
