Ayera Roderick A. (Ricky) Hoek a huramenta pa forma parti di e organo di mas halto di nos pais, Parlamento #11. Na Cas Ceremonial di Gobernador, Su Excelencia Gobernador di Aruba, Alfonso Boekhoudt, a huramenta Hoek y desde mesora e ta forma parti di e Fraccion di MEP den Parlamento.
Lider di MEP, Evelyn Wever-Croes a expresa cu pa e partido politico ta un orguyo di tin un otro profesional mas representado pueblo den nan fraccion, cu sigur lo eherce su trabou cu honor y dignidad manera cada un di e demas parlamentarionan di e Fraccion di MEP ta haciendo.
Ricky Hoek a studia Culturele en Maatschappelijke Vorming (CMV) na Fontys Hogeschool voor Sociaal Werk na Eindhoven, Hulanda y tambe a finalisa su Master in Arts in Social Work & Development na Universidad di Aruba. Hoek actualmente ta e ‘Professional and Society Practice Coordinator’ (coordinador di practica) y docente na Universidad di Aruba pa e estudio di Bachelor in Arts in Social Work & Development. Esaki ta haci cu Hoek ta un profesional prepara riba e area social y di enseñansa.
For di aña 2004 pa 2007 Ricky Hoek a traha den e funccion di trahado comunitario na Departamento di Asunto Social. Den e funccion aki e tabata encarga di dirigi un plataforma profesional consistiendo di cabesantenan di scol basico, Wit-gele-kruis, Polis di Bario, dokter di cas y clero den districtonan di Santa Cruz, Paradera y Noord. E meta di e plataforma tabata pa den un forma di colaboracion mutuo y estrecho atende e problematicanan social cu ta surgi den cada districto.
For di aña 2007 te cu 2017 Ricky Hoek a ocupa e puesto di director na Asociacion Trabao di Hubentud na Aruba, ATHA. Den e funccion aki e tabata encarga entre otro na ofrece e organisacionnan miembro di ATHA cursonan di desaroyo, fondo pa plan vacacional, proyecto encuanto Derecho di Mucha, jeugdmonitor, curso di Licht Verstandelijke Beperking na profesionalnan, dirigi plataforma pa persona cu limitacion y dirigi e proyecto Poder di Hubentud. Banda di e area profesional cu Ricky Hoek ta traha aden, e ta haci diferente trabou boluntario den comunidad.
