SPA a yama un reunion Reunion General di miembronan pa 1’or di merdia na Wilhelmina Park. Despues di e reunion ta bay entrega na Parlamento un carta unda ta pidi pa no pasa un ley cu por permiti Gobierno aumenta ki ora cu nan kier e cantidad di porcentahe cu ta reduci di salario di un ambtenaar, sin cu mester bay Parlamento.
Presidente di Sindicato di Polis Aruba (SPA) Jose Dirksz, a splica cu siman pasa SPA, SADA y SIMAR unda ta pidi pa stop di corta den salario di ambtenaarnan, principalmente di Polisnan. Awo a haya un invitacion di Gobierno pa sinta na mesa cu nan diaranson 3’or di atardi riba e carta cu a entrega.
Di otro banda a haya un invitacion di sorpresa pa dialuna atardi, riba e carta, pero SPA a sinti cu esaki tabata algo pa dividi e grupo di sindicato en bes di trece solucion. Den e reunion di ayera a enfatisa cu por corta pero pafo di e salario. Maduro di SADA a splica Gobierno cu si corta pafo di salario, e porcentahe ta bira 6.25, no 8.6% manera Gobierno ta bisa. Gobierno no por a duna bon splicacion riba e punto aki treci dilanti. E reunion di ayera tabata den basta mal tera.
SPA ta spera pa e reunion di diaranson. Pero ya caba a haya poco noticia desagradabel. Un di nan ta cu e concept di e ley pa b aha salario ta cla y ta na punto pa bay Parlamento. Den e concepto ta para cu ta bay corta 5% di e salario. Loke ta lamenta ta cu Gobierno tur e tempo aki tabata consciente cu nan tabata bay corta y simplemente a gaña, ganando tempo door di sinta cu sindicatonan na mesa. Esaki, el a bisa ta un falta di respet pa Polis y tur ambtenaar. “Nos ta hopi rabia riba e cos ak,” Dirksz a bisa.
E pio ta articulo 7 di e concepto di ley aki cu ta bisa cu Gobierno por hisa e porcentahe aki via un LBham, pues no mester pasa ni Parlamento. A base di esaki ta invita tur Polis pa un reunion general na Wilhelminapark. Ta bay delibera riba e proposicion di ley y despues ta entrega na Parlamento un carta unda ta pidi nan pa no bay di acuerdo cu ley.
