Diabierna mainta Gobierno di Aruba a informa pueblo pa medio di un rueda di prensa y un grafico cu den un restaurant ta permiti solamente dos persona na mesa. E informacion aki a plama hopi liher unda cu e la trece un disgusto grandi tanto localmente como tambe serca turistanan. E cambio aki sigur ta contribui na menos entrada pa restaurantnan. Despues di e rueda di prensa por a tuma nota cu e ley (Afkondigingsblad) unda ta comunica tur cambio ta papia un idioma diferente. A keda publica cu si ta trata di un famia cu ta biba hunto of un grupo di turista cu ta hospeda den e mesun camber por come hunto te na un maximo di 4 persona paden y 6 persona pafor.
Mientrastanto hopi turista a cuminsa comenta nan disgusto pa cu e informacion inicial cu a keda comunica. E motibo di esaki ta cu hopi famia ta biaha hunto y pa nan e no ta nada agradabel di sinta separa.
Pa loke ta e restaurantnan tambe e noticia aki a crea hopi disgusto mirando cu ja caba nan ta luchando pa sobrevivi. Awor cu e cambio aki nan capacidad di cliente den e restaurant ta baha y e gana pa un grupo di amigo of famia cu no ta biba den e mesun cas sali come ta baha drasticamente.
Restaurantnan ta compronde totalmente cu nos tin cu traha hunto pa baha e numbernan di contagio. Sinembargo pa baha e cantidad di 6 pa 2 persona ta hopi drastico y no ta contribui na stimula e economia cual ta yuda na mantene tatanan y mamanan na pia di trabou. Ariba diabierna mes por a ripara cu mayoria restaurant tabata hopi mas keto compara cu otro dianan.
Aki riba e imagen por mira e grafico di Gobierno unda claramente ta ilustra solamente cu ta 2 persona por sinta na mesa.
Aki riba Pagina 17 di e afkondigingsblad ab2021no.50 por nota e informacion compelto unda ta stipula na ki momento tin un excepcion.
Si Gobierno di Aruba a informa comunidad abiertamente, esaki no lo a crea disgusto den turistanan y afecta restaurantnan cu ja caba a sinti un caida den cliente hasta riba e mesun diabierna cu a anuncia e medidanan.
Adicionalmente por a mira varios reaccion tambe di turistanan riba e hecho cu si dos pareha biaha bin Aruba pa vakantie nan no por ta hunto riba beach of canando debi cu e cambia e cantidad maximo di samenscholing pa 2 persona.
