Diaranson mainta Su Mahestad Reina Máxima tabata orador principal na e evento di Fintech na Colombia, pa promove mas inclusion financiero. E miembro di Famia Real di Reino Hulandes a topa cu Presidente di Colombia diamars, mientras cu diaranson el a dirigi su mes na e sector financiero di e pais di koffie. Tabatin hopi interes pa scucha su mensahe.
SM Reina Máxima a bisa cu e tin net 10 aña sin bishita Colombia. E ultimo biaha cu e tabat’ey, ta solamente 30% di e pais tabatin acceso na un cuent’i banco. E gran mayoria tabata paga tur nan debenan “cash” y como tal no tabatin acceso na beneficionan bancario. Pero, e ta contento cu 10 aña despues, awe 60% di e poblacion tin cuent’i banco.
E Monarca Hulandes a sigura cu Nacionnan Uni ta promove mas inclusion financiero pa por duna e ciudadanonan mas opcion. Pago via plataformanan digital ta bin cu un sin fin di beneficio. Pero locual ta mas importante, ta demostra mundialmente, cu si bo tin cuent’i banco bo ta spaar mas. Ciudadanonan cu ta paga tur cos cash tin e tendencia di gasta tur nan placa y no tin acceso na banco pa por spaar.
Reina Máxima a haci un apelacion na e sector bancario pa duna “e homber chikito” un chens pa haya acceso na un cuenta, pa por disfruta di tur beneficio y facilidad cu pago digital ta trece cu ne. Pasobra separa di eficiencia, pago digital ta promove mas opcion medico tambe, cu hopi biaha net e grupo vulnerabel aki tin mas mester di dje.
E evento a tuma luga na Bogota, na Hotel Salvio, organisa pa Colombia Fintech. SM Reina Máxima ta riba un bishita di tres dia na Colombia como un representante di Nacionnan Uni, caminda cu e tema principal ta “Inclusion Financiero”. Basicamente e ta nifica sistemanan cu tur hende tin acceso na hermentnan pa un bon desaroyo riba tereno financiero, personal y empresarial.
E discurso di Reina Máxima tabata riba metodo di pago pa logra inclusion financiero. Mester bisa cu tabatin un delegacion di Aruba Tourism Authority (A.T.A.) y di Aeropuerto (AAA) presente den e foro aki. Presente pa Aruba tabata Jordan Schlipken-Croes (Aruba Tourism Authority, Director America Latina); Ronella Croes (Aruba Tourism Authority, CEO); Sanju Luidens (Aruba Tourism Authority, CMO.) y Jo-Anne Arends (Aruba Airport Authority, Business Development).
Mester menciona cu na su salida, e Monarca di Reino Hulandes a topa cu e delegacion di Aruba Tourism Authority y Aruba Airport Authority presente na e ocasion. El a mira e bandera di Aruba y mesora a bin saluda nan y e no a perde un chens pa manda un saludo pa e pueblo di Aruba. El a tene man di Ronella Croes y a manda un saludo pa nos isla, demostrando e lealtad y amor pa nos isla.
Tocante S.M. Reina Máxima
Reina Máxima (52) a nace como Máxima Zorreguieta na Buenos Aires, dia 17 di mei 1971. Awe e ta Reina di Hulanda despues di a casa cu Su Mahestad Rey Willem Alexander. E ta di cuater hende muhe den un famia real cu a nace den Latino America. Nan ta Josefina de Beauharnais di Francia naci na Martinica, e Reina Portugues María II, naci na Brasil y María Teresa di Luxemburg, cu ta di origen Cubano. E ta den funcion desde dia 30 di april 2013, pues net 10 aña. Máxima a studia y ta licensia den economia y tin un “master degree” den economia di Merca. El a traha pa e banco HSBC na New York unda el a yega t’e na e puesto di vice-presidente. El a traha tambe na Deutsche Bank na Belgica na aña 2000. Trahando na New York, na aña 1999, el a conoce SAR Prins Willem Alexander. Dia 30 di maart 2001 el a “verloof” cu e Prins y na februari 2002 el a casa. For di e matrimonio a nace tres yiu muhe, Prinses Amalia, naci dia 7 di december 2003, Prinses Alexia, naci dia 26 di juni 2005 y Prinses Ariane, naci dia 10 di april 2007.
