Te cu aña 2021, den Gabinete Wever-Croes I, e politico di Partido MEP a ocupa e puesto di Representante di Aruba den Union Europeo y alabes tabata vice Minister Plenipotenciario. Despues di eleccion a dicidi di no renoba su contract y consecuentemente a laga e ex-bankero sin trabou. Awo, siendo un ehecutivo di gobierno cu tabata cerca di tur negosacion cu Hulanda, ta purba ilumina pueblo riba e escogencianan cu tin awo riba mesa relaciona cu refinanciamento di nos debe cu Hulanda y e poder di supervision extra cu Madre Patria ta demandando.
E preguntanan cardinal ta:
1. Rijkswet Aruba financieel toezicht (RAft)?
2: Refinancia e debe cu Hulanda, pero na 8%?
3. Refinancia e debe na 6% (of mas) via Merca?
4. Refinancia e debe cu un grupo di inversionista priva na Hulanda, na 5% (of menos) y cu e posibilidad tambe di un reduccion den e suma total cu mester refinancia?
Diabierna ultimo Rijkministerraad (RMR) a dicidi cu e debe cu Aruba tin cu Hulanda (NL), lo wordo refinancia kisas hasta na 8% (!) na october proximo. Parlamento Hulandes a ordena gobierno pa impone un “strafrente” riba e interes si acaso fia Aruba placa atrobe. E decision aki ta debí na incumplimento di parti di Gobierno di Aruba.
Specificamente, na aña 2021 Gobierno di Aruba (GOA) a bay di acuerdo cu e condicion di NL pa Aruba resorta bou di un Rijkswet (Aruba) financieel toezicht (RAft). A pesar cu e debe aki mester a wordo paga bek den su totalidad na aña 2022, toch NL a bay di acuerdo pa refinancia e debe aki pa 1 aña mas, na 0 porciento. Pues, NL a demostra buena fe na Gabinete Wever-Croes, dunando Aruba tur tempo necesario pa recupera financieramente y pa por agenda e RAft pa Parlamento di Aruba debati y ratifica (of no aproba) e acuerdo aki di Gobierno di Aruba cu Gobierno di Hulanda. Of, pa proactivamente propone un otro plan.
Sinembargo, na october proximo (2023) ta pasa dos aña cu Gabinete Wever-Croes no a cumpli cu su palabracion cu RMR. Al contrario, desde principio di aña 2022, Gobierno di Aruba a pone tur speransa den e Staatssecretaris nobo, Alexandra Van Huffelen, entre otro pasobra cu e mandatario aki lo ta di un partido afilia cu partido MEP.
Pues, Gabinete Wever-Croes tabata carga e speransa cu e Secretario di Estado lo a hala aden e condicion pa Aruba pasa un RAft oficialmente. Tambe Gobierno di Aruba (y diferente Parlamentario) a lobby formalmente pa Hulanda la nan regala Aruba e debe aki.
Semper ta bon pa negocia. Hasta despues cu a bay di acuerdo caba cu un condicion. Lamentablemente, tur esfuerso di parti di Aruba, dus pa sea Hulanda elimina / regala Aruba e debe aki of pa toch refinancia e debe pero por medio di un “soft loan” sin un RAft, no a resulta. Al contrario, recientemente Tweede Kamer di Hulanda a pone pia abou(!) – pues a instrui Gobierno di Hulanda cu sin un RAft, cu Hulanda NO lo refinancia e debe aki na interes atractivo.
E pregunta awor ta; Aruba tin mas opcion? Kisas Aruba lo purba refinancia e debe aki cu Hulanda, via un prestamo nobo cu “Merca”? Esaki no ta imposibel. Sinembargo, mirando e posicion financiero (“debt to GDP”) precario di Aruba, e probabilidad ta hopi grandi cu un eventual prestamo nobo cu Merca lo ta caro; sigur 6.0% bay ariba. Claro, esaki ta miho cu e 8.0% cu Hulanda ta indicando di lo por ofrece Aruba.
Di otro banda, segun fuentenan, tin un grupo serio di inversionista na Hulanda cu ta dispuesto pa refinancia e debe aki di Aruba, na 5% (of menos).
Awor, teniendo na cuenta cu na final di dia Gobierno di Hulanda mester aproba cualkier prestamo nobo pa Aruba, e probabilidad ta grandi cu nan lo considera solamente un refinanciamento cu ta brinda Aruba e interes di mas abou. After all, segun Statuut, Hulanda ta keda responsabel pa bon gobernacion. Y den tur idioma, 5.0% ta menos cu 6.0% of 8.0%.
