Recientemente e refereenan di AVB a tene un conferencia di prensa caminda a duna nan punto di bista basa riba e situacion cu a sosode cu nan colega.
Manera ta conoci, durante pleno wega di futbol, entrenado di e ekipo La Fama a haya ta bon di agredi un referee. E situacion ta asina grave cu awe, e referee ta core peliger pa perde su wowo. Djey, e clubnan di futbol a reuni exigiendo AVB pa trece un solucion pasobra bala tin cu lora. A bay asina leu e tempo ey cu hasta a menasa di bula cabes di e presidente di AVB si e no resolve e situacion. Awo a yega turno pa e refereenan duna nan banda di medaya. Nan ta dispuesto pa fluit wega pero cu condicion mara na dje. Siguientemente, e punto di bista di e refreenan:
“Pa varios aña largo nos a trece na AVB y clubnan e ponencia refereenan ta wordo abusa verbalmente, fisicamente, na nan auto personal cu ta wordo kibra y hasta na nan cas. Ta casi dies aña pasa cu referee a para campeonato pa e mesun motibo aki, cu e situacion di siguridad pa nos refereenan. E situacion ta degenerando dia pa dia y cu esaki por tin consecuencianan extremo pa nos refereenan.
E casonan a sigui bira mas y mas pio y ni AVB ni clubnan a preocupa pa tuma esaki na serio. Den e ultimo añanan por a mira un escalacion di bringamento, atakenan cu cuchiu y video unda e club-y dirigentenan cu comportacion anti deportivo y unda hasta muchanan chikito cu ta bin wak wega di futbol, ta haya ta bon pa coba mama di referee. Pero semper den tur instancia ta e referee tabata fout! Nos a keda soporta soporta y soporta te cu dos pasa e buchi a yena ora un colega, Luis Bedoya, cooperando cu un team di AVB a wordo maltrata di tal forma cu awe a perde su wowo!
Y kico clubnan y AVB nan prioridad ta? Sigui cu wega! Niun hende ta compronde cu refereenan ta humano! Cu refereenan tin famia y sernan keri y cu tur locual nan a pasa aden asina mes semper a coopera pa weganan sigui aunke mas y mas bao menasa mental y fisico. Awor cu campeonato ta para atrobe ta e falta di e refereenan!
Luis ta drumi y lanta cu dolor tur dia den su wowo. Si e haya un tiki chens di drumi cu e inmenso dolor di cabes di tur dia! Awe nos ta aki pa duna nos punto y pakico tur referee mester di e garantia di e clubnan prome cu subi tereno pa fluit! Ora un hungado faya gol bashi, pasa bala malo of faya un pinalti niun reclamo riba social media pero laga referee haci un fout chikito, mañan, e dirigente-di clubnan mes ta skeiro video rond!
