Prome Minister a bisa siman pasa cu e proceso pa legalisa cannabis medicinal ta cana bon, pero a bin topa cu un problema. Banconan local ta bisa cu nan no por yuda cu esaki hopi, pasobra internacionalmente ta perhudica nan. Mayoria di e banconan ta afilia cu un banco na Merca, unda cu mayoria ciudad tin marihuana legal.
Ricardo Croes, lider di fraccion di RED, a bisa cu ta trata di un industria di cannabis medicinal y desde decada 60 Hulanda a cuminsa un industria di cannabis recreacional di cual nunca nan a haya problema pa bay banco. Pa 40 aña esnan cu ta deal cu cannabis, nan placa ta yega banco na un manera of otro. Canada tambe tin banco afilia na Aruba y tambe ta conoci p’e industria cannabis recreacional pero no medicinal so.
Mas di binti estado di Merca a legalisa cannabis na un forma. Nan no a haci esaki solamente den cannabis medicinal pero cannabis recreacional. E parlamentario ta na altura cu riba nivel federal, Merca tabatin contratiempo pa placa yega banco. Esey no a stroba e industria aki florece na Merca y no a stroba e economia pa draai.Na momento cu el a cuminsa lanta Legalize Cannabis Foundation, nan tambe a topa cu problema pa haya un cuenta bancario na e banconan comercial, pero nan a haya esaki na RBC y esaki ta pa motibo cu ta afilia na Canada. E ta haya straño con ta posibel cu e fundacion si por a haya un cuenta bancario, cual otro banconan local a nenga y a uza e mesun excuus. Esaki ta un industria nobo, un entrada economico nobo y no pa Aruba so.
Segun Croes, otro paisnan mundial a bisa di a haci un analisis y cu cannabis medicinal ta un manera pa restart economia, pero Aruba no por. Esaki ta nifica cu na Aruba e pensamento ta hopi leu. E ta di pensamento cu Aruba en general a realisa cu no por depende di turismo so. Desde basta tempo mester a realisa esaki, el a bisa. Na momento cu el a drenta politica, Croes ta bisa pa bay den e direccion ey, manera tin otro industria agricultura, energia. E kier sa unda Aruba ta para cu e plan, pasobra otro parti ta dispuesto pa eherce esaki, pero door di Merca no ta haci esey. E kier sa unda e willingness di e pais ta, den banconan pa participa y yega na e industria aki. No solamente e gobierno mester cambia e mentalidad. Despues di dos aña por tende cu Minister Maduro a bisa cu no por legalisa cannabis pasobra banconan a bisa cu no por. Aruba no tin nada pa produci, pasobra tanto turismo como comercio di petroleo a cay. E ta puntra si a haci un investigacion profundo pa loke ta trata legalisa cannabis medicinal.
