Gobierno di Aruba a tende di Secretario di Estado di Hulanda, Alexandra van Huffelen, cu tin espacio pa por reduci e recorte salarial bou di empleadonan publico y semi-publico. A pidi pa entrante dia 1 di juli 2022, pa elimina e 5% cu ta kita tur luna for di nan salario y entrante dia 1 di januari 2023, elimina e resto di 7.5% di e beneficionan. Secretario di Estado a menciona cu di su banda e no ta mira problema pero e ta keda falta aprobacion den Conseho di Minister di Reino, cu tabata awe mainta. Sinembargo, pa motibo desconoci, no a tuma un decision final y a manda e punto di agenda pa e siguiente reunion, dia 24 di juni 2022.
E cambio di fecha aki ta pone cu, gobierno lo mester warda un luna mas y lo por introduci e cambio aki, si haya aprobacion di Hulanda, den salario di fin di luna di juli 2022. Si logra, e empleado publico y semi-publico lo cobra su salario completo, pues sin e reduccion di 5% di tur luna.
Tempo cu e introduci e medida aki, a anuncia cu e lo ta pa tempo indefini. Sinembargo, den e negosacionnan entre Hulanda y Aruba, recientemente a haya e impresion cu tin un espacio pa suavisa e medida. Pa coincidencia, e cambio di posicion di Hulanda a bin apenas algun dia prome cu e manifestacion yama pa sindicato di empleadonan publico. Ambtenaarnan a mustra nan disgusto cu, mientras ta corta den nan salario, cu ta nota cu gobierno ta sigui gasta y por lo menos no ta duna indicacion cla di bahamento di nan propio gasto. Pero, ora cu a anuncia cu lo elimina e medida, automaticamente e interes pa manifestacion a baha drasticamente.
Loading…
Reload document
Open in new tab Gobierno di Hulanda a pone dos condicion prome cu elimina e medida. E prome ta cu e politiconan si ta keda cu recorte di 25% for di nan salario, pues tanto minister como parlamentario. No tur di nan a aprecia e condicion aki for di Den Haag. AVP a bisa den parlamento di ta di acuerdo, mientras MEP a bay di acuerdo cu condicion cu lo corte te cu december 2022 y cu despues di esey nan tambe lo mester cobra nan salario 100%. Raiz y MAS a vota contra e recorte pa politiconan, mientras cu Accion21 no a ni atende dicho reunion.
E di dos condicion tabata cu Gobierno di Aruba mester keda cla cu cortamento di salario di e top funcionarionan di compania y entidadnan semi-gubernamental, manera ta Refineria di Aruba, Utilities Aruba, WEB Aruba, ELMAR, SETAR, ImSan, Aruba Tourism Authority, Aruba Ports Authority, Aruba Airport Authority, Banco Central, Serlimar, Post Aruba, Arubus y tur otro. Parce cu ainda no a yega na un decision final, pasobra e no ta bay solamente pa corta salario di director, pero tambe di ehecutivonan cu ta cay bou di nan. Tin di e directornan aki ta gana dos te tres biaha mas cu minister-president di nos pais. Pues si analisa e parti aki bon, a schuif e discusion awor for di e ambtenaarnan pa e empleadonan di compania estatal cu ta na turno awo pa recorte, por lo menos esunnan den top di e companianan.
Prome Minister mr. Evelyn Wever-Croes no a duna un comentario ainda riba e echo aki, e no tumamento di decision di Conseho di Minister di Reino awe. Awor e empleadonan publico a keda djis cu un promesa den man, sin ehecucion y sin garantia cu Hulanda di berdad lo bay di acuerdo cu e peticion aki.
