Siman pasa, RBC Royal Bank (Aruba) N.V. a habri oficialmente e filial renoba na RBC Sasaki. Cu e banco di futuro na Sasaki, RBC ta duna direccion cla pa e futuro cu ta alinia cu servicio na cliente den e era digital awendia.
Rob Johnston, Head, RBC Caribbean Banking –hungado importante pa posiciona e banco pa exito y crecemento den e era digital– a bisa den su speech: “mundialmente nos ta experiencia disrupcion digital, pa esey nos ta prepara nos banco y nos comunidad pa e futuro, den cual digital y mobile ta hunga un rol mas y mas importante.
Como banco nos mester ta innovativo y agil pa nos por anticipa riba e expectativanan di nos cliente pa nan por traha cu nos segun nan deseo, na manera simpel y eficiente. RBC Sasaki ta un di e filialnan den Caribe cu ta duna bida na e vision ey”, asina Johnston a bisa.
Segun Pierre Rafini, Country Manager, RBC Aruba, e filial nobo y completamente renoba na Sasaki ta un reflexion di e concepto “reimagined banking”, e vision di RBC pa cu servicio bancario den futuro. Banda di esey e banco ta tuma pasonan innovativo real pa defini e vision ey. “E diseño di Sasaki branch ta completamente diferente for di filialnan di banco tradicional. Den nos filial di Sasaki nos enfoke ta riba servicio digital combina cu servicio personal pa nos cliente. Den palabranan simpel: servicionan tradicional y nobo ta uni na nos Sasaki branch”, asina a bisa Rafini.
Na Sasaki branch, RBC ta ofrece servicionan mas tradicional, manera personal y business banking, e salanan di reunion renoba, combinan cu servicionan nobo, como e RBC mobile “Specialized Sales Force”, “in-house Discovery Zone”, dunando acceso facil y cumbiniente na nos servicionan bancario online y mobile, opcionnan digital, y dos ATMnan full-service cu tin tambe posibilidad pa deposita placa non-stop. Asina RBC ta duna bida na “reimagined banking” na Sasaki branch. Segun e director di RBC esey ta e concepto nobo di banco pa futuro.
E filial nobo a wordo habri formalmente den presencia di Ministerio di Finansas, Asunto Economico y Cultura, Sra. mr. Xiomara Ruiz, Ministerio di Husticia, Seguridad y Integracion, Sr. mr. Andin Bikker y Executive Director, Banco Central di Aruba, Sr. Prakash Mungra. Tur esnan presente a wordo invita pa bishita y experiencia e “branch of the future” renoba. E banco tin un historia largo y distinto na Aruba y den Caribe y ta comprometi na e comunidadnan caminda nan ta opera. E ta un parti importante di e strategia di RBC y pa esey dos fundashonnan a ricibi un donashon digital, Fundacion Casa Cuña Progreso y Fundashon Aruba Little League como reconocemento di e tremendo trabou cu nan ta haci pa e desaroyo di e hubentut na Aruba.
