Cuerpo Policial Arubano (KPA) a bini hunto pa celebra esunnan cu a ricibi bevordering (promocion) y ambsjubileum. Un total di 24 polis a haya nan bevordering, mientras seis di nan a haya nan ambtsjubileum.
drs. Ramon Arnhem, altocomisario, a expresa cu e tabata hopi importante pasobra e respet p’e coleganan, e trabounan cu nan ta haci. Tambe reconocemento di e coleganan ta hopi importante. A haci esey door di a tene un fiesta.
A reconoce diferente funcion, diferente rango manera brigadier, hoofdagent, hoofdagent eerste klasse, incluso inspector. Tambe mesun importante tabata e rango di ciudadanonan, comite, comite principal, coordinadonan, tanto e personal ehecutivo como personal civil. “Nos ta union. Nos tin wowo pa tur hende”, el a expresa.
E altocomisario a bisa como mensahe: “Laga nos sigui. Laga nos tur traha hunto. Nos mester t’ey pa otro, nos ta un famia, nos ta forma union.” E ta pidi pa nan concta cu otro, sostene otro. Incluso pa haci nan trabou bon y esey ta percura pa paz y siguridad pa Aruba. “Desde e bon organisacion aki, nos ta bay percura pa desaroya opleiding y vakmanschap”, el a indica.
