Den un publicacion recien basa riba entrevista cu Notario, Ralph Yarzagaray durante programa di Enfoke comienso di siman, por a tuma nota cu Yarzagaray a duna un splicacion amplio riba con economia di Merca ta impacta nos na Aruba. Relatando esaki tambe riba poder di compra di propiedad y cas riba nos isla. Akinan Yarzagaray a bay over na splica un rato tambe tocante e mercadonan principal cu ta influencia mercado di Aruba.
“Si nan cuminsa cana na Miami camisa paden afo, aki na Aruba tambe nos ta cuminsa cana camisa paden afo.” Den otro palabra, Yarzagaray ta bisa nos cu mercado di Merca tin influencia grandi aki na Aruba den varios aspecto. Si cosnan cambia eybanda, esaki ta traspasa su mes cerca nos den cuestion di algun dia. Segun Yarzagaray, ta pasobra asina cerca nos ta di Merca. Nos banco central no tin oro den nan kluis. Dollars bo ta haya.
Nos florin no ta cubri cu oro, e ta cubri cu dollar. P’esey nos ta semper 1.78/1.75, y si dollar subi e florin ta subi, si e cay nos ta cay.
