Ora cu a lansa e pregunta na notario, Ralph Yarzagaray durante un entrevista den Enfoke recientemente riba kico ta pasando na Directie Infrastructuur en Planning (DIP), el a contesta cu ‘Nan tin huiswerk pa haci, DIP tin su retonan.’
Pero e departamento aki ta enfrentando reto pa varios aña caba, pa kico ainda no ta cuminsa bini cu un solucion pa cosnan cuminsa cana debidamente, ta loke hopi den pueblo ta puntra. “P’esey mi ta bisa bo nan ta den un soño profundo, pero ban spera no eterno,” Yarzagaray a ripiti cu un sonrisa na su cara. Pero den tur seriedad, e situacion aki cu DIP ta perhudica hopi cos na Aruba.
Por ehempel, e ta perhudica comercio, y hopi ta hasta bisa nan tin Aruba su economia secuestra. Yarzagaray ta bisa cu esey por ta riba termino corto, pero riba termino largo bo por gan’e bek si bo tin un bon maneho, cu ainda bo tin tereno pa otorga.
Yarzagaray a mira hopi gobierno bin y bay, anto e sa precisamente por ehempel cuanto acta e ta pasa den su negoshi. E notario a recientemente yama su amigonan na Kadaster y bisa nan con a bay e ultimo siman. “Biento ta fuerte, lama ta halto, pero no tin pisca. Kico esey kiermen? Ora no tin pisca, negoshi ta plat.”
Kadaster tin cu sali y emiti e terenonan, anto Departamenten Voor Dienst Landmeetkunde en Vast Goedregistratie (DLV) tin cu midi nan. Awendia bo mester bin cu infrastructura, cual ta envolvi WEB cu ELMAR NV tambe.
