Loke cu Minister di Asuntonan di Energia Glenbert Croes a anuncia cu hopi fanfaria recientemente riba boramento pa petroli, pa e partner di coalicion Raiz ta un problema. Raiz ta hopi comprometi cu aspectonan di naturaleza y medio ambiente y cualkier daño cu un proyecto por causa, ta algo cu nan lo no apoya.
Hustamente tabata den noticia e dianan aki e barge cu a bolter den area di Trinidad & Tobago y cual a causa cu e mancha di azeta a cuminsa move direccion di e islanan ABC. Hasta por a nota cu Boneiro for di siman pasa a sinti e efecto di esaki.
Hustamente esaki a hala atencion di partido Raiz, cu den fin di siman a haci un publicacion den cual nan ta haci un yamada urgente pa reevalua e asunto di petroleo, despues di e sucedido na Trinidad & Tobago. “Ta imperativo pa nos move pa alternativa sostenibel y stop e practicanan di perforacion di petroli.”
Nan ta referi nan mes riba e reciente desaroyo cu nan ta considera alarmante, unda cu Crisis Management Office (CMO) a anuncia cu Aruba a keda poni bao di alerta di codigo oranje debi na e derame extenso di petroli originando for di Trinidad y Tobago. “E catastrofe ambiental aki no ta solamente resalta e menasanan inmediato na e bida marino y e ecosistema di nos costanan, pero tambe ta subraya e necesidad urgente pa un reevaluacion di nos dependencia riba practica di perforacion di petroli.”
Raiz ta bisa cu siendo un plataforma comprometi na proteccion di naturalesa, nan ta mira e incidente aki como un recordatorio claro di e impactonan devastado cu tal accidentenan por tin riba nos planeta y sigur riba nos isla chikito.
“Nos posicion ta consistente cu nos principionan: Ta imperativo pa nos move pa alternativa sostenibel y stop e practicanan di perforacion di petroli. E evento recien na Trinidad y Tobago ta sirbi como un advertencia grave di e potencial pa desaster den futuro. E echo ta cu loke tin na azeta of otro producto petrolero bou tera ta bira cada bes mas dificil pa saca, cual ta forma un peliger directo pa nos medio ambiente y consecuentemente aumento di prijs. Como isla, nos no tin niun control riba esaki. Mientras cu si nos inverti den energia renobabel, nos ta mas den control y den harmonia cu naturalesa.”
Na final nan ta bisa di ta boga pa accion inmediato y cambio di politica pa preveni incidente similar. Como parti di nos compromiso pa preserva nos planeta, nos ta urgi tur individuo, comunidad y gobiernonan mundial, pero specialmente den Caribe, pa uni den e lucha pa un transicion pa solucion di energia limpi.
“Nos tin cu proteha nos ecosistemanan, sigura e bienestar di e siguiente generacionnan y fomenta un coexistencia sostenibel cu nos naturalesa. Esey ta e meta! “
