E Organisacion Rainbow International awe ta celebra e World Wetlands Day. Un fecha decreta door di Nacionnan Uni. E conmemoracion aki ta sirbi pa crea conscientisacion pa e importancia di zonanan humedo. Zonanan humedo ta sostene ecosistemanan vital y ta mantene biodiversidad y na Aruba ta inclui rooi, saliña, lagun, area di mangel, pasto marino (seagrass beds) y rif di coral.
TEMA PA 2024: ZONANAN HUMEDO Y BIENESTAR HUMANO
E Secretariado di e Tratado pa Zonanan Humedo, (RAMSAR Convention on Wetlands), ta invita un y tur pa uni na e mensahe pa 2024 pa World Wetlands Day, cu ta “Wetlands and Human Wellbeing”, esta “Zonanan Humedo y Bienestar Humano”.
NA ARUBA
E problema principal di Aruba pa loke ta zonanan humedo ta e falta di un ordenanza nacional pa medio ambiente (Landsverordening Milieubeheer). Consecuentemente e obligacion pa haci estudio di impacto ambiental no ta regla pa ley y ta legislacion pa proteccion di naturaleza so por ser aplica.
Den e periodo 2005-2009 pa extende e periodo pa utilisacion di dump di Parkietenbos a designa gran parti di e area di mangel banda di e dump original pa ser converti den celnan pa dera sushi. Den un tesis pa Bachelors Degree di 2015 di e studiante Rikkert Loosveld di University College Utrecht, titula “Improper waste management and the increasing threat to the Aruban economy. An assessment of adverse effects of antrhopogenic disturbances on the Parkietenbos mangroves of Aruba” ta documenta extensamente e daño haci y e contaminacion den y rond e mangelnan cu a keda na Parkietenbos y e ambiente marino di full e costa sur di Aruba pabou di e dump.
Construccion di e brug nobo pa Green Corridor Aruba, cu tawata rekeri pone pilon pa e brug me-mey di mangelnan den e area proteha di Spaans Lagoen, registra como RAMSAR wetland segun e Tratado pa Zonanan Humedo, a kap mangel, pero a planta e ekivalente di e area perdi di mangel bek den e mesun area. Den e mesun area di Spaans Lagoen sinembargo a permiti construccion sin ningun permiso of estudio di impacto ambiental di e Balashi Cabins.
Den area di Pos Chikito y Savaneta a permiti kapmento di mangel pa casnan y proyectonan super luhoso pa turismo ser construi, mayoria di nan construi pa habitante/comerciante stranhero.
Na Santo Largo y Mangel Halto Gobierno tin planea pa amplia infrastructura pa ricibi turista, pero e embeyecimento aki lo bay afecta negativamente e mangelnan den e areanan aki.
Den e area cu ta core for di comienso di pista di aeropuerto te cu dump di Parkietenbos a kap mangel tanto riba tereno di aeropuerto y pa ampliacion di e marina na unda tin un monton di yate y barco mara. A lo largo di Bucutiweg completo y e parti di costa dilanti Kas Paloma a permiti un free for all di construccion di pier, unda a construi mey-mey di mangelnan y a kap mangel na gran escala.
Hasta den e area cu ta core for di Eagle Beach te e actual area for di Divi Phoenix te Hilton na otro banda di e caminda principal a kap mangel of altera tereno di mangel, y den full e banda pabou di Bubaliplas areanan di mangel a keda afecta pa construccion di e hotelnan den e area aki.
Den e Landsbesluit di 5 mei 2020 (AB 2020, no.67) un cantidad di area nobo a keda declara area proteha y poni bou maneho di Fundacion Parke Nacional Aruba.
Segun Landsbesluit inheemse flora en fauna, 8 augustus 2017 (AB 2017, no.48) den articulo 2, a base di articulo 4, inciso 2, sub a di Landsverordening Natuurbescherming (AB 1995, no.2) a declara tur cuater tipo di mangel na Aruba como especie proteha y segun articulo 6, inciso 2 di Landsverordening Natuurbescherming ta prohibi pa kita parcialmente, por completo of daña mangel. Mester constata cu casi tur caminda ta viola proteccion di (area di) mangel, esta zonanan humedo.
Recientemente a surgi e problema di creacion di un beach pa Embassy Suites cu a ser para pa via di proteccion di mangelnan y yerba di lama.
Pero mester constata cu e problematica di e planta di purificacion na Bubali RWZI y maneho sano di e zonanan humedo den e proyecto Western Wetlands den cual pa diferente zona humedo incluyendo e Bubaliplas a pidi status di zona colectivo proteha den Tratado RAMSAR, ta mustra cu falta hopi pa un adecuado maneho di zonanan humedo na Aruba tuma luga.
