E situacion di Fundacion Respaldo tin atencion di Rainbow Warriors Core Foundation. Segun su presidente, Milton Ponson, entrante dia prome di november 2022, Fundacion Respaldo ta haya su mes obliga di dal e afdeling Verblijf cera.
E afdeling conoci den boca di pueblo como PAAZ situa banda di hospital lo tin cu pone binti paciente psikiatrico riba caya.
T’asina cu gobierno di Aruba no a cumpli cu Fundacion Respaldo pa loke ta e AWG 900.000 y consecuentemente no por sigui opera e afdeling Verblijf.
Dos cos ta resalta. Tur e pashentnan cu lo ta poni riba caya ta paga parti di nan gasto mediante e echo cu nan bijstand y/of pensioen ta bay directamente riba cuenta di e instancianan concerni pa nan cuido psikiatrico.
Di dos punto ta cu recientemente den cuadro di Dia Mundial di Salud Mental a menciona cu Stichting GGZ, Fundacion Hunto pa Mental Health Aruba y algun gremio mas, ta atentiendo DEBIDAMENTE cu e cuestion di salud mental na Aruba. Y cu Fundacion Respaldo tambe ta forma parti di e ekipo di Gobierno tratando e tematica aki. Esaki ta resulta di ta un mentira flagrante awo.
Pa “add insult to injury” recientemente a inaugura e edificio di Fundacion Refugio Social cu ta un ” bed, bad en brood” voorziening, pues pa refugiado Venezolano.
Ta tristo pa constata cu pa refugiado Venezolano SI tin fondo disponibel, pero pa pashent Arubano psikiatrico cu mester di (un lugar di) cuido, NO!!!!
