Tur aña Quota International of Aruba ta organisa siman di kibra silencio. E prome a tuma luga na luna di mei na aña 1989, haciendo cu ta 31 aña ta organisa e siman aki. September tambe ta conoci internacionalmente como e luna di conscientisacion pa esunnan cu tin problema di oido.
Pesey mes Quota ta organisa na september diferente campaña pa aumenta e conscientisacion pa tur cu tin problema di oido y siman di kibra silencio ta un di nan. Durante e siman aki, cu ta cuminsa otro siman dia 14 di september, lo conduci testnan pa hendenan por bin na FEPO of bay na The Specialist, pa nan haci test di nan oido.
E aña aki, considerando cu tur loke mester tene cuenta cu ne, ta reduci e cantidad di hendenan cu lo haci test. E caminata cu ta haci anualmente a cay afo. Esunnan cu ta yama pa haci test, tene cuenta cu e protocol ta importante pa yega na ora, pa ta sigura tambe cu ta tene nan mes na tur protocol instrui di parti di Departamento di Salud.
Mariela Navas-Figaroa, director di servicio cu ta encarga cu proyectonan di comunidad, a splica cu e tin hopi aña den Quota y haciendo e trabao aki. E ta gradici un y tur pa nan cooperacion y e luganan cu ta bay test cu ta cooperando cu Quota. Tur hende sa cu nos ta pasando den e pandemia. Quota a pensa si sigui pa haci e siman di kibra silencio. Sinembargo mester keda apesar di loke ta pasando, duna conscientisacion y pa cuido di oido. Lo tin testnan gratis e aña aki na FEPO y tambe na The Specialist. Ya por cuminsa yama pa haci un cita pa e test di oido.
Quota ta pensa riba personanan cu problema auditivo. Door di e bistimento di mondkapje, un hende cu problema di oido, cu hopi biaha ta lesa loke nan ta wak den bo cara, awor aki ta un tiki dificil pa nan pa por comunica cu nan. Lo pidi tur hende si bo sa cu ta un persona cu tin problema di oido, tene cuenta cu ne. Tene un distancia, baha e mondkapje un rato, splic’e of purba cu seña. Pa e hendenan aki e periodo aki ta dificil pa e comunicacion.
Dia 14 di september, otro siman dialuna atardi pa 2’or, ta cuminsa na FEPO oficialmente cu e siman di kibra silencio. Lo bay tin un persona cu ta un cliente di Quota cu nan conoce, cu lo bay bira e persona cu problema auditivo cu pa nan lo bira un persona di aña. E lo ricibi un reconocimento y tambe tin un persona hopi conoci, un VIP pa test otro siman. Teniendo cuenta cu esaki, esnan cu kier haci uzo di e oportunidad pa haci test na nan oido mas pronto posibel yama .Tin cu tene cuenta cu e aña aki, e cantidad di hende ta limita pa haci test.
Lo test tur esunnan interesa na FEPO, situa den Engelandstraat 15, cu number di telefon 5831016. Tambe na The Specialist Aruba, situa den Caya Betico Croes 222, den Cayena Mall, cu telefon 2902020. Por haci cita tambe via WhatsApp na 6402020. Esaki ta e luganan cu por haci cita pa haci test di oido.
Ivy Simon ta representa e directiva di FEPO y ta Vice-presidente di e directiva ehecutivo y fellow Quotarian tambe. El a indica cu FEPO a cumisa 30 aña pasa. Di e tempo ey caba, FEPO t’ey pa brinda sosten y cuido di nos oido na comunidad di Aruba. E proceso di FEPO ta, cu e siman di kibra silencio, FEPO ta coopera cu Quota. Despues di e test eynan, e ora ta bay nan dokter di cas y despues di dokter, ta recomenda e ora si nan tin un deficiencia, nan ta bin e ora na FEPO.
FEPO ta para pa tur esnan cu problema di oido. Di chikito te cu grandi y FEPO sigur ta aporta y ta apoya e proyecto tremendo di Shatter Silence Week, cual no ta tur biaha bo ta hay’e. Un bes pa aña esaki ta pasa na unda cu durante un siman largo e testnan ta wordo haci completamente grandi. Ta invita comunidad di Aruba pa probecha e oportunidad aki. E aña aki un tiki diferente. Tin cu cumpli cu tur e protocolnan. E biaha aki e ta hopi mas tiki. Talbes durante di aña e lo ripiti, pero no sa ainda dependiendo di Quota. Pero for di awo FEPO ta sostene Shatter Silence Week.
