E partido politico Pueblo Prome a bishita un di e sindicatonan mas grandi di Aruba, Federacion Trahadonan di Aruba (FTA), pa conoce e retonan mas comun den e sector laboral di nos pais. E partido kier ta sigur di por inclui deseo di e gremio sindical den nan plannan y nan programa di gobernacion.
A topa cu e directiva diario di e sindicato na nan sede na San Nicolas. Jan de Ruijter di e directiva di partido tabata presente hunto cu candidatonan prominente di e sector di labor, esta Stephan van Spaandonk y Leandro Henriquez.
E reunion a bay den masha bon ambiente. Masha poco partido politico a duna atencion real na e sector sindical, cu ta representa miles di trahado den tur industria cu ta rekeri trahado. E sindicato a biba momentonan di reto e ultimo aña aki, durante e pandemia. Siendo un di e paisnan cu a haya e sla mas duro debi na nos dependencia na turismo, Aruba mester a conta cu sosten financiero di Madre Patria pa tene negoshinan y nan trahadonan na bida.
E retonan sinembargo ta leu di ta tras di lomba. E siguiente aña aki ainda lo tin hopi reto, specialmente ora adapta e forma di sosten via FASE y subsidio di salario. Lo mester evalua bon pa trahadonan no sali victima di ningun sorto di reforma den e ayudo cu ta brindando. Ta nota cu turismo ta bounce back miho cu a spera, pero keto bay varios compania den HORECA ta paga trahado e minimo di 60% di nan salario, pa cual ta spera mas transparencia y convivencia di parti dunadonan di trabou pa cu nan trahadonan.
Tocante partido Pueblo Prome
Dia 22 di maart 2021 a funda partido Pueblo PROME na notario. E prome directiva ta consisti di Michael Williams, Jan de Ruijter y Francis Lejuez. Pueblo PROME ta bay nan prome eleccion dia 25 di juni 2021 c’un lista di 12 candidato y Michael Williams ta lider di partido. Nan ideologia ta democracia comunal.
Tocante Sindicato F.T.A.
Federacion di Trahadonan di Aruba, FTA, ta existi desde aña 1964. Nan ta un di e sindicatonan mas grandi na Aruba, cu mayoria di su miembronan for di e sector hotelero. Awendia nan ta conta cu mas of menos 3000 miembro, parti den mas of menos 50 compania. Presidente actual ta Hubert Dirks. Nan ta afilia na International Trade Union Confederation.
