Aruba ta bay haya su di dos parke di molina di biento y a scoge e area di Rincon. A scoge pa pone e di dos parke di molina eynan pa motibo cu esaki meste ta na un distancia di 850 meter leu di vivienda. Den un conferencia di prensa minister di energia hunto cu e directornan di WEB y Utilities, y director interino di Elmar a duna mas informacion riba e proyecto aki.
Minister di Energia, Glenbert Croes, a bay riba e echo cu mundo ta para dilanti decision crucial cu mester ta tuma pa salba economia di pais y salba planeta. Despues di e crisis di pandemia, problema geopolitico y guera conduci na un crisis di energia. Esaki na mes momento a crea un crisis economico cu inflacion, yama Energy Inflation, cu ta causando impacto negativo economico rond mundo. E inflacion aki a hisa prijs di tur cos na tur pais y awo combina cu e crisis climatico, cu tabata tumando luga pa hopi tempo.
Anthony Rojer, director di Utilities N.V. Aruba, a splica cu ta den un lucha pa combati emision y purba salba e planeta y pa asina por biba den un ambiente mas limpi. E planta nacional ta contribui cu 60% dje total 100% na emision, tambe auto cu ta core sea di diesel of gas ta contribui un 27% na esaki, mientras cu landfill manera Parkietenbos ta di 13% cu ta 100% dje emision emiti aki na Aruba.
Alfredo Koolman, director di WEB Aruba, a informa cu e azeta, esta HFO, ta contribui grandemente na e CO2, p’esey nan a haci esfuerso pa baha e dependencia di azeta. A haci esey di un nivel di 6200 bari pa 400 mil bari den ultimo decada y mey. Cu e ultimo motor introduci na juni, esaki lo baha na 3900 bari pa dia. Si kier limita e CO2 dañino pa medio ambiente, tin cu reemplasa e HFO.
Albertico Koolman, director interino di N.V. Elmar, a informa cu na 2012 nan a introduci e connection policy y esey a haci posibel cu cliente por a conecta nan mesun solar riba grid di Elmar. P’esey pa residencial ta permiti 10 kilowatt, pa comercial ta 100 kilowatt.
