Aruba ta respondiendo na e yamada pa vacuna masalmente pero tanten cu e mayoria di nos comunidad no ta vacuna y proteha ainda, tur protocol y medida ta keda vigente y aplicabel.
Esaki ta e motibo pakico un persona cu recientemente a vacuna lo wordo buta den cuarentena preventivo si e tawata tin contacto estrecho pa un periodo largo cu un caso positivo. E vacuna di Pfizer cu actualmente Aruba ta brindando tin un eficacia di 95%. Esaki no ta nifica cu e persona vacuna lo no por contrae COVID-19 y sigui plama esaki, pero esaki ta nifica cu es cu a vacuna tin 95% menos chens di desaroya sintoma fuerte y complicacion compara cu es cu no ta vacuna na momento di bin den contacto cu e virus.
Sabiendo cu bo haya e vacuna ainda tin e posibilidad di contrae sintomanan leve y por sigui plama e virus. P’esey ta importante cu tanten mayoria di comunidad no ta vacuna esnan cu si ta vacuna wordo poni den cuarentena si e bin den contacto directo cu un persona cu ta infecta. Di e forma aki ta evita di sigui plama e virus pa es cu no ta vacuna ainda y cu si por bira hopi malo di esaki.
Manera cu DVG ya a informa, e vacuna no ta evita 100% cu bo no ta haya COVID-19. E posibilidad ta keda cu bo por contrae esaki pero cu sintoma leve y mientras cu comunidad ta vacunando y ainda no yega un cobertura halto di entre 75% pa 85% di vacunacion, tur medida di proteccion y tur protocol ta keda vigente. P’esey e yamada ta na comunidad pa sigui registra y vacuna. Mas lihe vacuna comunidad mas lihe ta limita of stop e virus di sigui plama di un pa otro.
