Recientemente Comerciante Uni Aruba (CUA) a duna declaracion riba e medidanan existente relaciona cu Covid-19. Nan ta haya cu no tin base mas pa mantene e medidanan na vigor.
A uza como ehempel, e parada di diadomingo ultimo y henter e campaña electoral. Diadomingo ultimo a tuma nota henter un jump up cu bebemento, tur hende riba otro mientras cu keto bay ta permiti solamente dies persona pa sinta na mesun mesa den un restaurant.
Prome minister demisionario a comenta den un conferencia di prensa recien dilanti Gabinete di Gobernador, cu pronto Crisis Team lo suavisa mas medida. Segun Wever-Croes, a wanta un rato cu e suavisacion di e medidanan debi na eleccion. Pero e ta un hecho cu, e punto di suavisa medida ta riba agenda pa e siman aki y por spera cu diahuebs e cluster di Crisis Team lo vota riba dje.
