Secretario di Estado Alexandra van Huffelen a biaha pa Caribe. Despues cu inicialmente a menciona cu e lo ta aki banda tambe, esey a resulta di no ta e caso.
E situacion aki a lanta hopi wenkbrauw, esta e echo cu van Huffelen ta yega te aki banda y no ta bishita Aruba. Ta mustra manera cu e no tin nada di papia cu Aruba. Un actitud cu ta lanta hopi pregunta.
Awo a mira cu Prome Minister Evelyn Wever Croes a pone un post riba Facebook di Gabinete Wever Croes cu el a bay aeropuerto pa topa cu van Huffelen.
Esaki a sosode diaranson atardi ora cu Secretario di Estado Alexandra van Huffelen tabata na Aruba di transito pa Boneiro. Durante estadia cortico na Aruba, Premier Evelyn Wever-Croes a probecha di e oportunidad di delibera cu e Secretario di Estado riba diferente tema entre Aruba y Hulanda.
Premier Wever-Croes den su declaracion ta bisa cu na varios ocasion el a menciona cu ta na mesa ainda cu Hulanda. Y cu su encuentro na aeropuerto cu Secretario di Estado ta prueba di esaki. “Importante ta cu Aruba keda na mesa cu Hulanda pa yega na un solucion, pasobra a pesar di kico por ta e circunstancia, ta na mesa bo ta yega na e miho solucion pa Aruba”, Prome Minister a enfatisa.
Loke ta hala atencion cu e mandatario ta papia di a discuti tema di interes, pues un combersacion oficial, toch no ta menciona nada di e tema discuti, ni kico a palabra.
