Federacion di Ahedres cu entusiasmo y gran cooperacion di Traimerdia a prepara su projecto ‘Ahedres ta bai den Bario’ pa start dia 5 di april 2018. Desafortunadamente pa motibonan fuera di nos alcance nos no por a logra haña e International Master (trainer) for di Venezuela pa Aruba.
Despues di algun contratiempo e trainer tawata tin su ticket pa diasabra e biaha via Panama pa yega Aruba diadomingo 8 di april 2018, pero awe a haña e mensahe cu Copa Airlines a anuncia cu e ta cancela tur su vuelonan pa 3 luna y na e momento aki ta difícil pa haña seguridad riba un fecha cu e trainer por yega Aruba.
E lesnan na Traimerdia tawata programa den cyclus di 3 luna y tawata di cuminsa dia 9 di april te cu fin di juni, pa despues cuminsa bek na september. Cu e inseguridad riba e venida di e trainer nos no ta haña oportuno pa sigi pospone e fecha mas prome cu schoolvakantie, como cu e lo bai afecta e efectividad y eficiencia cu nos ta purba di mantene cu e projecto.
Nos bestuur a tuma e decision pa pospone e fecha pa start pa dia 1 di september 2018. Nos lo sigura nos mes pa prome cu nos lanza e projecto den september cu nos tin e trainer na Aruba, pa evita un caso similar (si ainda e relacion cu Venezuela no a drecha).
Nos ta spera cu tur mucha y mayornan por mantene e enthousiasmo pa e projecto un par di luna mas. Nos lo tene tur nomber di e muchanan den file y asina cu e trainer ta na Aruba nos lo busca contacto atrobe cu e mayornan.
Nos ta pidi nos disculpa pa cualquier inconveniencia. Alavez nos kier a yama danki na tur mayornan pa e confianza cu nan tin den nos projecto, y tambe tur sponsor, school, Centro di Barionan, MFA, Bibliotheek, Prensa y voluntarionan, cu a yuda nos den e projecto.
Nos ta spera cu nos por sigi conta riba boso sosten y ayudo.
