Santa Rosa, formando parti di directiva di Hadicurari, ta lamenta hopi con full e proceso a bay. Manera cu Natalie Maduro, directora di Santa Rosa, a menciona anteriormente, nan tabata tin cierto temporadanan cu coleganan di nan, den e seccion di pesca, a haya e oportunidad pa duna conseho. Bayendo bek pa nan controla tur e rapportnan cu nana yega di entrega, den tur rapport semper Santa Rosa ta papia di no bin cu prohibicion, pasobra e lo tin un impacto negativo riba e piscadonan, cual ta un sector hopi importante pasobra ta papiando di sector primario.
A wak tambe cu e ley no ta cay directamente bao di responsabilidad di Santa Rosa. Pero, tabata tin den varios oportunidad cu nan a traha rapportnan, a manda conseha nan. Kisas bin cu un sistema di zonificacion, pa asina por tin miho control. Otro sugerencianan cu a duna ta, en bes di prohibi, por ta bin cu regulacion. Mester a bin tambe den nan opinion, un campaña di concientisacion pa asina e hendenan por comprende pakico e ley aki ta bay tuma luga. Por bisa si cu desde Augustus aña pasa, a pidi den nomber di e directiva, un reunion cu e director di e departamento di medio ambiente riba rumornan cu a cuminsa core y a haya un contesta di dje, cu e no ta traha riba rumor. Cu e no ta bay bin e reunion, cu e no ta kere cu e no mester contesta ningun di e preguntanan. Asina a bolbe haya un reunion. A hasta reuni cu kustwacht y buscando informacion cada cu tabata purba di yega na nan pa haya informacion, e tabata difícil pa por a haya feedback. Como departamento cu ta encarga cu sector di pesca, e lo tabata mas cu etico cu por a haya un copia di un concepto di e ley prome cu el a wordo firma. Con cu wak’e e tin di haber cu un sector y ainda ta papiando awor aki solamente di e parti di pesca. Pero ainda falta full e lista di matanan local cu no mag di wordo kita mas. Bo ta haya tambe e criadornan. Nan tambe ta bay tin cierto reto cu e ley aki, pa motibo cu bo tin e criadonan cu tin e custumber di laga nan bestia cana los por ehempel y awor aki tin cu bay tene cuenta cu b’a pasa un ley cu ta bay limita nan, pero kico como Gobierno ta bin cu un solucion pa nan. Di parti di Santa Rosa, Maduro a sinta en berdad pa loke ta e parti di cria den varios reunion y lamentablemente ta wak cu nan sugerencianan no tampoco a wordo teni den consideracion pa e parti eynan. Pa loke ta trata e parti di pesca, awor aki Santa Rosa, hunto cu nan experto riba bida marino, lo bay haci un recapitulacion di tur e rapportnan cu a traha caba, pa asina kisas si tin un Parlamento nobo of bin un gobierno nobo, cu nan lo por convence e minister eynan. Ta spera cu e minister di sector primario, ken cu e por ta, cuminsa realisa cu sector primario ta hopi mas importante cu locual hendenan ta realisa. Ta papiando aki di siguridad di cuminda. Tin como Gobierno SDGnan cu ta papia tur ora di dje cu ta e metanan internacional cu kier yega na dje. Pero con bo por pasa un ley cu ta bay traha directamente en contra cu motiva y desaroya un sector. Pa nan tambe e ta eigenlijk hopi negativo e ley aki y vooral cu nan no tabata tin ningun input mas e ultimo parti di e ley. A duna Semper conseho, pero ta wak cu hopi di e consehonan ey no a wordo teni na consideracion.
