Heart-Centered Leadership Foundation ta organisa den augustus un programa pa hobennan cu enfoke riba desaroyo personal. E ‘Impact Camp’ aki lo ta un ‘ACE Program’ (Achievement and Commitment to Excellence), cual ta wordo treci en colaboracion cu EduCare Foundation di Los Angeles, California.
E ta un programa interactivo y divertido di 3 dia unda hobennan ta siña tocante diferente aspectonan cu ta yuda nan desaroyo. Topiconan cu lo bin dilanti durante e 3 dianan ta autoestima, motivacion, kico ta bo ‘comfort zone’ y con pa sali di dje pa logra bo metanan, comunicacion efectivo, responsabilidad personal, expresion propio, amistad, y hopi mas. Esaki lo ta e di 8 ‘ACE Program’ cu Heart-Centered Leadership Foundation ta ofrece hobennan. 
E programa a demostra di ofrece hobennan hermentnan pa nan sigui bai dilanti na school, empodera nan pa haci cambionan positivo den nan bida personal, comunica den un manera positivo y efectivo cu mayornan y amistadnan, y pone e prome stapnan pa traha riba un futuro feliz y duradero. Cu e programa aki ta traha riba transformacion di bida, fomentando hobennan responsable, respectuoso, y resiliente cu ta firme para den nan sapato. Impact Camp tabata un di e proyectonan ganador den e programa ‘Pitch Time’ di CEDE Aruba. Hunto cu Aruba Marriott Care Foundation como sponsor por ofrece e programa aki na hobennan net prome cu aña escolar nobo cuminsa. 
Impact Camp ta tuma luga dia 12 di augustus pa 14 di augustus, di 9:00 am pa 4:30 pm na Ballroom di Marriott Aruba. Edad di participacion ta 15 pa 21 aña. Na final ta culmina cu un ‘Anochi di Famia’ unda mayornan ta wordo invita pa bin presencia kico nan hobennan a experiencia. Ultimo dia pa registra ta 26 di juli 2019. Heart-Centered Leadership Foundation a wordo funda na 2008 cu hobennan na curason di su meta: empodera y inspira hobennan pa lidera for di nan curason. Heart-Centered Leadership Foundation ta traha riba desaroyo di hoben door di ofrece diferente programa, seminario, ‘after school programs’, guia y coaching pa asina fomenta hobennan sigur di nan mes y determina.
