Kuminsando djaluna último, Programa di Urgensia den kolaborashon ku Centrale Bank van Curaçao en Sint Maarten (CBCS), BDO Dutch Caribbean i Fundashon Negoshi Pikiña den kuadro di Global Entrepeneurship Week a tene Siman di Sèn 2018.
Durante e siman di 12 pa 16 di november, e tim a pasa na St. Jozef VSBO, Maris Stella VSBO i Joseph Civilis pa duna e promé kursonan di e proyekto aki. Kada skol tabatin e honor di risibí un minister pa e apertura di e proyekto na nan skol. Promé Minister, sr. Eugene Rhuggenaath, a bishitá St. Jozef VSBO. Minister di Salú, Medio ambiente i Naturalesa, sra. Suzy Camelia-Römer, a bishitá Maris Stella VSBO. I Minister di Desaroyo Sosial, Labor i Bienestar, sr. Hensley Koeiman, a bishitá Joseph Civilis VSBO. Tur tres minister a hiba palabranan pa enkurashá e hóbennan kon pa atendé di un forma responsabel ku sèn. Den e siman binidero lo bishitá Juan Pablo Duarte tambe pa asina kompletá e apertura di e proyekto aki.
Hóbennan entre 14 i 18 aña ta partisipá den e proyekto aki. Nan ta risibí kurso i workshopnan grátis serka trahadónan di CBCS i BDO, i nan ta siña kon pa traha un presupuesto, kon pa buska fondo pa proyekto, i tambe kon pa hasi un análisis di preis i kalidat. Siman di Sèn ta un proyekto ku tur aña ta keda organisá na Hulanda tantu na skol básiko komo sekundario. Esaki ta di dos aña ku ta implementá e proyekto tambe na diferente skolnan sekundario na Kòrsou. Kada skol ta risibí un donashon di 3000 mil florin di CBCS pa implementá un proyekto na benefisio di e skol. Pues despues di e promé siman tras di lomba, lo bai tin mas kursonan relashoná ku e proyekto aki.
Centrale Bank van Curaçao en Sint Maarten, BDO Dutch Caribbean i Fundashon Negoshi Pikiña ta sostené Programa di Urgensia pa implementá proyektonan di edukashon finansiero den e kuater barionan di Programa di Urgensia. Manera ta konosí Programa di Urgensia ta dirigí su mes riba mehorashon di e situashon di biba i traha pa pueblo di Kòrsou, ku e enfoke riba Montaña, Buena Vista, Otrobanda i Barber.
