Presidente di Parlamento, mr. Edgard Vrolijk a habri luna di september cu un auto nobo. Ta trata aki di un Honca CR-V modelo 2024 di casi 100.000 florin. Esey ta su balor pa cumpra, pero manera ta conoci, Parlamento no ta cumpra sino lease, cu ta inclui seguro, number di auto y service di e auto pa un periodo defini. E lease di e ultimo Honda a termina y a scoge pa renoba e acuerdo cu un auto nobo nobo.
Aunke cu e tipo di gastonan asina ta regla den presupuesto di Parlamento di Aruba, toch e “timing” cu ta scoge pa saca auto nobo ta keda cuestionabel. Mientras cu pueblo ta den austeridad y ta confronta aumento drastico di costo di bida, ta parce mas bien cu politiconan ta den un desconexion total di e realidad cu pueblo ta bibando aden.
Auto caro
No ta solamente e echo cu ta lease un auto, sino e balor excesivo di e auto ta locual tin hopi hende disgusta y hasta desiluciona den politica en general. No por kita for di e percepcion cu varios di nan, den funcion ehecutivo, ta luci y biba un standard di bida cu hamas nan lo por a biba prome cu nan a bira parlamentario of minister.
Oposicion: Gasto innecesario
Por lo menos un miembro di Parlamento di Aruba, drs. Gerlien Croes, a vocifera cu esakinan ta gasto innecesario. E parlamentario independiente a bisa: “Mi ta kere, na e crusada cu Aruba ta, si nos por a core bay trabou tur dia prome cu bo a bira minister of Presidente di Parlamento den bo mesun auto, dicon awo lo no por”.
Tocante Edgard Vrolijk
Na aña 2000 Edgard Vrolijk a termina su estudio na nivel HBO como maestro di scol, specialisa den educacion di studiante entre 6 pa 12 aña. Na aña 2012 el a logra e titulo di Bachelor in Law y nuebe aña despues, esta na aña 2021, el a obtene esun di Meester in Rechten. Edgard Vrolijk a drenta arena politico den eleccion di aña 2013 y a obtene 586 voto riba su nomber. Na aña 2017, el a aumenta pa yega na 749 voto. Sinembargo, despues di a sirbi como parlamentario cuater aña largo entre 2017 pa 2021, den e ultimo eleccion el a bay atras cu 17.3% te na 619 voto.
Parlamento di Aruba
Manera tur otro pais den Reino, nos tin un democracia parlamentario na Aruba. Esaki ta nifica cu e ciudadano, a traves di e miembronan elegi den parlamento, tin influencia den maneho di e gobierno. Parlamento ta pues, e organo di mas halto den e staatsinrichting di Aruba y ta representa henter Aruba.
Actualmente Parlamento di Aruba ta consisti di:
- Movimiento Electoral di Pueblo (MEP) – 9 asiento (42,9%)
- Arubaanse Volkspartij (AVP) – 5 asiento (23,8%)
- Partido RAIZ – 2 asiento (9,5%)
- Partido Movimiento Arubano Soberano (MAS) – 2 asiento (9,5%)
- Partido ACCION21 – 1 asiento (4,8%)
- Parlamentario Independiente – 2 asiento (9,5%)
Edgard Vorlijk (MEP) ta e Presidente di Parlamento, na momento cu e ta ausente Raymond Kamperveen ta tuma su luga mirando cu e ta e vice-presidente di Parlamento. E parlamentario cu mas voto den e aña parlamentario aki ta mr. Mike Eman (AVP) cu 6668 voto mientras cu esun cu menos voto ta Aquannette Gunn (MAS) cu 77 voto individual.
