Despues di un preparacion riguroso di hopi siman largo, den tur secrecia, awe mainta trempan a muda presonan na Boneiro pa e prizon nobo, situa na Plantage Aruba. E operacion a sosode bou control estricto y cu Polis y mariniernan fuertemente arma riba henter e ruta.
Pa haci e mudansa, a uza trucknan militar grandi, cu chauffeurnan cu cabes tapa cu “bivakmuts”. Mientras militarnan a para strategicamente riba henter e ruta, a uza helicopter pa por tin bista for di halto.
Na final di e operacion Wibo de Vries, director di “Justitiële Inrichting Caribisch Nederland”, a informa cu e mega operacion a termina bon y segun plannan.
E compleho di prizon nobo, situa na Plantage Aruba, a costa 40 miyon dollar y tin espacio pa cera 113 detenido. E tin espacio special pa hobennan y, contrario na e prizonnan na Aruba, Corsou y Sint Maarten, esun nobo aki SI ta cumpli cu tur norma internacional.
