Den un entrevista exclusivo pa 24ora.com, Rosa Martina Ridderstat, mama di e fugitivo Gerson Martina, a habri porta di su hogar p’asina duna un poco mas informacion di kico lo por ta e causa cu a pone cu su yiu a tuma e paso cu e la tuma y asina huy di prizon KIA.
Bubali 53 ta/ tabata e hogar di Gerson Martina prome cu el a cay cera y condena pa atraco di cual e tabata sinta castigo pa 4 aña caba. For di eynan Rosa Martina a duna su declaracion. Den comunidad e fugitivo aki ta ser considera uno peligroso cu ta motibo di panico y consternacion cu te ainda no a logra pone man riba dje. Señora Rosa y mama di e fugitivo no por imagina e situacion cu su yiu tabata pasando aden den KIA, pa 4 aña, y sin cu e ta haya e atencion cu e ta pidi.
El a haya un castigo di 4 aña y a pasa 5 aña cera entre cuater muraya caba. E ta remarca tambe cu tur locual ta pasando no tin atencion di mando di KIA. E mama di su banda ta di opinion cu e palabra criminal cu ta uza pa describi su yiu no ta corecto, e ta un atracador y ta pidi rectificacion pa esaki. E mama ta conta cu na aña 2017 su yiu a keda hinca door di un otro preso pero e informacion cu a bin dilanti ta cu ta su yiu a keda apunta como e agresor di e caso ey. “Nan no por bisa hopi cos pero no por gaña esaki, pasobra nos tin e pruebanan.” E mama tin potret di cicatriznan cu su yiu a keda a causa di e hincanan cu el a ricibi. El hasta haci denuncia di e agresion contra dje, pero nada no a wordo haci. “Nan a bisa pa laga e caso aki den man di OM, pero nan ta keda culpa mi yiu di e sucedido. Mi ta lamenta y no por biba cu e hecho cu no a kere mi yiu maske un denuncia a keda entrega.”
Rosa Ridderstat ta bisa: “Mi yiu a huy pasobra e no por a soporta e abuso mas y a sinta su castigo caba”. E no por compronde kico ta tuma luga den KIA. E ta kere tin algo eyden, pasobra nan ta bisa cu ta e a hinca e homber, mientras ta Gerson ta esun cu a keda cu marcanan di hinca. P’esey el a haci denuncia, pero nada no a sali afo di e caso aki. Despues cu el a bay Corte december aña pasa, nan a bis’e cu el a haya seis luna mas y lo sali dia 5 di juni, 2019. Pero esey no a sosode. Algun dia prome nan a inform’e cu e lo bolbe haya un aña mas. Segun e mama su yiu no por wanta mas e situacion den KIA, siendo cu el a sinta su castigo caba. “Prome cos mi kier pidi mi yiu pa entrega su mes. Pero mi yiu a bisami cu e no ta entrega tanten cu nan no dun’e su libertad, pasobra el a sinta su castigo caba.”
Niun momento Gerson a informa nan cu e ta bay huy di KIA. Ademas, e mama ta bisa, e no ta kere cu e lo tabatin e curash’i pa bis’e esaki, “pasobra mi lo no tabata di acuerdo cun’e.” E mama ta admiti cu e yiu a pasa cerca dje pa salud’e, dialuna, y despues el a bay sin bisa nada. El a bisa cu e ta dispuesto pa nan scuch’e pero na Warda di Polis pasobra na KIA e no kier bay mas. Den KIA nan ta “pest” e tur ora. Pa finalisa, e mama a bisa cu Gerson “no ta peligroso”.
