Presidente di Parlamento mr. Edgard Vrolijk na final di e encuentro entre e islanan Corsou, Aruba y Sint Maarten (CAS), a participa den un conferencia di prensa.
Eyden a confronta e parlamentarionan di MEP riba e reaccion di oposicion kendenan no tabata di acuerdo cu su expresion of atake contra Hulanda cu a impone un interes halto riba prestamo haci na Aruba.
Loke ta remarcabel ta cu e presidente parce awo ta bay haci un wega di palabra. E ta nenga di a señala Hulanda como un abusado y ta bisa cu solamente el a uza e palabra “haci negoshi”. Sinembargo mester señala cu ayera e frase completo cu el a bisa tabata: “Pero haci negoshi riba lomba di esunnan afecta pa un crisis mundial, ta un abuso. Mi ta kere cu nos tur aki den, di un of otro manera tin e mesun sentimento aki.” Pues tur hende por conclui cu un persona cu ta comete abuso ta un abusado.
El a keda bisa “solamente mi a uza e palabra haci negoshi na momento di crisis ora cu ta bay fia placa y ta klap 6.9%. Pa mi, na e momentonan ey bo ta haci negoshi. Esey ta mi palabra. Niun momento mi a bisa e palabra abusado. SI nos ta coge den e contexto ey ta completamente robes. Nos a bisa “haci negoshi” y na mesa a bis’e varios biaha. Nos no ta aprecia cu ta mal uza un momento cu ta pidi pa haci uzo di articulo 36 di statuut. Y awo nos no ta nenga di paga, pero ta paso no kier un RAft (ya cu tin LAft cu tin e mesun funcion) ta klap nos un 6.9%. Asina e tabata.”
Tambe Vrolijk a comenta riba e hecho cu e ta critica y Prome Minister ta firma un acuerdo toch cu Hulanda. Riba esaki el a bisa cu ta bon pa bay bek den historia ya cu na 2020 a firma e acuerdo. E momento ey Aruba no tabatin otro caminda. Tabata manera lomba contra muraya, pasobra a sinti cu mester a firma e acuerdo pa duna e pueblo di come. Aruba, na su opinion tabata, no por a haci nada otro. Pero a firma e acuerdo bou di e condicion cu e ta bay Raad van State, cu a duna un conseho devastador riba e Rijkswet y riba COHO, cu a wordo bari di mesa. E ta bisa cu e mesun argumentonan pakico tabata contra COHO ta conta awe pa e Rijkswet Aruba financieel toezicht (RAft).
A menciona tambe cu un otro parlamentario a mustra cu e Rft a stroba su pais den e desaroyo economico y mara nan na debe cu nan mes no kier. “E no ta cuestion cu a firm’e pero di necesidad. Si nos ta keda hunga politica barata cu esey, mester para. Como bon Arubiano mester para hunto awo pa bisa cu e cos aki no por. Bo por tin pensamento of ideologia politico,pero awo ta papia di Aruba, nos pais. Como bon Arubiano, nos tin cu para hunto y corigi e situacion,” el a bisa.
A enfatisa cu solamente kier pa Hulanda trata Aruba di un forma husto.
Tambe na 2022 a entrega relato na Hulanda, pa cambia procedura. Pero te dia di awe Aruba no a haya contesta riba e preguntanan haci. Hasta a manda carta pa Tweede Kamer y Conseho di Minister di Reino.
Mester pone e asunto aki riba agenda di Tweede Kamer, unda cu un delegacion mester bay Hulanda pa entrega amienda riba e leynan. Awo e ley ta den man di Hulanda y nan mester contesta si ta sigui procedura of sigui na mesa pa un solucion hibrido, manera menciona door di Prome Minister.
