For di basta dia caba riba e rednan social por mira cu e pelicula ‘Barbie’ tabata tendencia. Y door di e mesun tendencia aki, Gloria@The Movies a uni su mes na esaki na caminda pa e estreno di “Barbie:The Movie” otro siman diahuebs, segun Devin de Veer, Sales & Marketing Manager di The Movies@Gloria.
Door di esaki, nan a organisa varios evento, di cual e prome ta riba e anochi di premiere di ‘Barbie: The Movie’ na The Movies@Glori, otro siman diahuebs, dia 20 di juli. E prome anochi lo tin un evento pa damanan pa 7:00pm, unda cu lo tin un cocktail hour n’e patio di PF Chang’s, cu lo tin un duracion di un ora cu lo conta c’un animacion di un dj femenino. E evento aki ta exclusivo pa damanan di 18 aña bay ariba.
Pa 8:00pm nan lo subi ariba pa e VIP auditorium di The Movies@Gloria. E anochi aki nan a partner hunto cu Aldo, Paper Sisters y Fun Miles, unda cu nan lo ricibi un ‘goodie bag’ for di nan partnernan. Tambe lo tin un premio pa e dama miho bisti.
Diabierna no tin niun evento riba programa y e siguiente evento ta riba diasabra. E dia aki nan ta enfoca mas riba e mamanan cu nan yiu muhe di 13 aña bay ariba, unda cu nan lo tin un ‘tea party’, pa ta mas specifico un ‘Barbie tea party’, unda tur cos ta bay ta ros: for di snacks te cu bebida. Despues di esaki nan lo por bay wak e pelicula. Un momento perfecto pa e mamanan por haci algo cu nan yiu muhenan, un ‘uitje’, unda cu e muchanan toch por disfruta di nan vakantie na cas mes.
Despues di esaki, De Veer a sigui bisa, diadomingo nan lo tin un Barbie bazaar, unda cu nan a opta pa duna oportunidad n’e entrepeneurnan femenino cu tin un negoshi local chikito pa por demostra kico nan tin: e por ta sapato, paña, joyas, bela, etc. Pero e pensamento tras di esaki ta pa enfoca riba entrepeneurnan femenino cu tin un negoshi local chikito pa comparti cu e pueblo di Aruba kico nan tin di ofrece. Esaki lo tuma luga diadomingo 23 di juli na Gloria mes. Esun cu ta interes por tuma contact cu nan di biaha, p’asina por sigura nan luga. Nan no ta reserva y pa sigura bo cupo, tin un costo di 25 florin.
Motibo pa cual nan a cera un acuerdo cu Aldo ta pa motibo cu recientemente Aldo a lansa un liña di sapato di Barbie. Ta un momento perfecto pa uni cu nan, ya cu nan tambe ta bezig ta enfoca riba e pelicula.
Paper Sisters a bati na nan porta, oa forma parti di e evento aki y e ta klop cu e pelicula.
Tambe nan a partner cu Greygoose, mirando cu nan a bin cu algun cocktails nobo, cual ta un oportunidad perfecto.
PF Cheng’s tin su patio, cual tabata e escenario oportuno pa tene e actividad di Barbie riba e anochi di estreno.
BARBIE THE MOVIE
E estreno di “Barbie” a causa un expectativa grandi desde cu na 2018, Robbie (“The Wolf of Wall Street”, 2013) a revela cu e tabata den negociacion pa protagonisa un pelicula basa riba e co’i hunga popular di Mattel comercialisa pa prome biaha mas di 60 aña pasa.
E pelicula ta dirigi pa Greta Gerwig, cu tabata nomina pa un Oscar pa “Ladybird” y “Little Women”, ta draai rond di un popchi cu ta biba dne Barbieland y ta expulsa n’e mundo real pa no ta suficientemente perfecto.
E keintura pa Barbie a traspasa e pantaya y pa varios luna e ekipo di marketing di e pelicula di Warner Bros. a haci e miho trabou posibel pa promociona su estreno dia 21 di juli proximo.
For di tiendanan pasahero “pop-up”, experiencianan inmersivo n’e mundo di Barbie, colaboracion cu e marcanan di paña, sapato, rolschaats y chup pa lama te na un edicion special di e liña di autonan di co’i hunga Hot Wheels, e frankicia a logra cu poco marca comercial a keda pafo di e invasion di “pink Barbie.”
