Ta bon pa nos tene cuenta cu e asunto di tene hende na curason, venga otro, kibra otro, pone trampa pa otro,traiciona otro,y esun di mas tristo cual ta kibra bida y famia di otro, no ta bini di Dios.
Hende mester cuminsa compronde cu un bida di dos cara no ta bida, un bida di dobel animo, of dobel personalidad, no ta agrada Dios, un hende cu no ta firme, ta biba cu wowo cera, y e no kier acepta e realidad di bida cu Dios tin p’e.
Dios den tur sentido, kier bendiciona nos y duna nos un bon futuro (Jeremias 29:11) pero si nos no kier laga pasado bay y ta uza pasado como un kruk di manipulacion, of un garoti di excuus, ta bira duro pa nos por alcansa un futuro briyante den Cristo Hesus.
Den bida nos mester pordona y laga los y sigui pa dilanti y tene cuenta cu lo siguiente:
Den un matrimonio mester tin pordon, sino diabel ta horta bo felicidad.
Entre mayor y yiu mester tin pordon, pa asina por tin pas den famia.
Bo no por traha cu un colega di trabao cu bo ta odia, bo tin cu pordona,pasobra e produccion den trabao ta baha.
Asina cu bo mira un hende y e cosnan malo di pasado ta lanta den bo cabes, bo tin di laga los.
Mientras cu bo no pordona un hende, e persona ey tin influencia riba bo, pasobra e ta kita bo atencion.
Pa bo cuminsa algo nobo, bo mester laga e cosnan bieu bay.
Bo no por djis divorcia y core bay casa cu otro hende, sin pordona prome, y arepenti di bo mes un fout, sino bo ta hibando maleta di problema den bo bida nobo.
Ora bo ta sinta den un posicion caminda, bo tin di yuda hende, tene cuenta cu bo no por tin hende preferencial, tur hende ta hende, no uza hende su pasado, pa asina cera porta pa nan.
Nan tambe kier un oportunidad den bida.
Dios den su inmenso amor a libera nos for di nos pasado pa asina e diabel no tin gara riba nos mas;
2 Corintionan 5:17 ta para skirbi; P’esey si un hende ta den Cristo, ta un criatura nobo e ta, e cosnan bieu a pasa caba, ata, tur cos a bira nobo.
Ora un hende bini na Cristo e no tin pasado mas, awor e tin bida nobo den Cristo, pasobra su pasado ta scondi den Cristo y den Dios (Colosensenan 3:1-6) y Dios su promesa ta pa haci e cosnan grandi p’esey Dios ta bisa cla den su palabra pa no recorda cosnan di pasado (Isaias 43:18+19).
Hopi biaha ora un hende acepta Cristo Hesus den su bida, y su bida a cambia, bo ta haya otro, para na banda ta critica y ta bisa, cu awor e ta kere ta masha cos e ta, awor e a bira Cristian, pero antes e tabata adicto, homosexual, lesbiana, ladron, bandido, parandero, criminal, y awor diripiente e a bira santo, ta haci cherche y bisa cu awor e persona a bira pastoor. Pero esunnan cu ta para na banda no sa cu nan ta haciendo bon propaganda di Dios su bondad, pasobra ta solamente Dios por cambia hende.
Pordon ta trece felicidad den bo hogar, den bo relacion, den bo famia, den e ambiente na trabao, den e relacion den iglesia, den tur nos amistadnan. Ora nos pordona, nos bista ta habri, pa nos por tin claridad den nos bida.
Dios kier pa nos pordona otro mescos cu El a pordona nos (Colosensenan 3:12-14).
