Dia 25 di april ultimo, Vereniging van Werknemers met een Individuele Arbeidsovereenkomst In Dienst van WEB NV (VWI) a tene eleccion pa un directiva nobo. E miembronan nobo di e directiva di VWI ta Clifford Heyliger como presidente, Leonardo Reyes como secretario, Giomar Arendsz como tesorero, Andrew Boekhoudt y Jenny Geerman como miembro.
VWI ta representa mas o menos 80% di tur staff y e profesionalnan (manager y supervisor) cu ta traha pa WEB, cu ta conta cu un total di 310 empleado.
Sinembargo, awo por papia di un conflicto di interes. Den e ultimo eleccion, Clifford Heyliger tabata aparece ariba lista di Partido AVP y ta forma parti di e directiva di AVP. Y te asina leu cu nos tin informacion, e no a tuma retiro for di partido.
Pregunta ta keda: Ora di bay negocia un contracto colectivo nobo of den cualkier reunion den cual e sindicato tin representacion, cu cual pechi Clifford Heyliger lo negocia e ora? E lo bisti e pechi di politico (activo) of esun di sindicalista?
Rumornan cu ta circula den comunidad ta cu Clifford Heyliger a vocifera di lo kier retira for di e mundo di politica activo, ya cu e no ta sinti pa sigui mas den politica.
Ken ta Clifford Heyliger?
Clifford Heyliger a nace y crece na San Nicolas. Na edad di 14 aña el a bay Hulanda pa caba scol secundario y pa sigui su estudio superior. Despues di su estudio el a bolbe Aruba y a bay traha den hotel pasobra cu e no tabata por a haya trabou den ramo tecnico cu el a studia. Ora cu a habri un oportunidad den refineria el a aplica y wordo acepta. Aunke e funcion no tabata den su ramo di estudio. finalmente el a haya oportunidad pa traha den e planta di WEB Aruba NV y cu añanan di trabou y experiencia, el a bira hefe di e laboratorio di WEB Aruba NV.
Clifford Heyliger tabata un sindicalista cu a representa e trahadonan di WEB Aruba NV pa hopi aña. Coleganan ta describi Clifford como un lider cu ta scucha su hendenan bon, prome cu e papia of haci algo.
E ta casa y tin dos yiu teenager.
POLITICA
Tabata na april 2021 cu Heyliger a lansa su mes como candidato riba lista di Partido di Pueblo Arubano, AVP y tabata candidato number 9. El a haya un total di 350 voto.
Tocante VWI
Vereniging van Werknemers met een Individuele Arbeidsovereenkomst in Dienst van WEB NV (VWI) a wordo funda dia 20 di december 2018. E sindicato di empleadonan c’un contract di trabou individual emplea pa WEB NV (VWI) ta un organisacion cu ta enfoca riba representa interes di e empleadonan cu ta emplea na WEB riba base di un contract di trabou individual. E asociacion aki ta hunga un rol crucial den garantisa e derecho- y interesnan di e trahadonan aki.
