Awe corte a trata e caso penal contra e agente policial Robert Vos, contra kende a presenta seis acusacion cu tin di haber cu coopera cu prensa of suministra prensa informacion.
E acusacionnan ta: Malversion di portofon y charger; robo di portofon y charger; di a viola regla di secresia di trabou; mal uzo di su funcion; soborno pasivo y participacion na un organisacion criminal.
Tur e caso aki a cuminsa pa motibo cu prensa ta yega hopi lihe na sitio di sucedido of hasta tin biaha prome cu polis. Asina a lanta sospecho y a cuminsa un investigacion.
Na final a bin descubri na cas di e funcionario policial tres portofon conecta na tres laptop cu, segun e dossier, ta pasa informacion pa tres diferente outlet di prensa cu por scucha e meldingnan cu ta drenta.
Pa cu e caso aki a scucha cinco miembro di prensa pero no por a saca mucho informacion. Nan ta papia di no a paga Vos pero si ta bisa cu a yega di prest’e placa of dun’e sponser pa su actividadnan na fabor di deporte, ayudo na esnan cu no tin luga di biba, mucha- y hendenan pober.
E mes ta admiti di a laga e medionan di prensa scucha e meldingnan. “Mi tabata kens y mi no sa con pa bisa no ora un hende pidi’mi un fabor. Pero mi no a haya pago pa haci esey,” el a bisa hues.
Fiscal no a kere y a bisa cu tur e acusacionnan ta proba y a pidi un castigo di 36 luna di cual 8 luna ta condicional, tres aña di prueba. Y tambe cu durante cinco aña e no por ocupa un funcion publico.
Pa sorpresa di tur hende, hues a tuma un pauze y ora di bolbe a cera tratamento di e caso y dicta sentencia di biaha. Cuater acusacion el a haya proba y dos no. Pa esaki el a impone un castigo di 16 luna di cual 8 luna ta condicional, tres aña di prueba y tres aña e no por ocupa un funcion publico.
Pa un relato amplio lesa TREMPAN.
