Manera ta conoci, pa 11:00pm tur establecimiento mester ta cera, incluyendo restaurant, barnan y clubnan nocturno. Esey tin di haber cu e reglanan estricto cu Gobierno ta manehando pa contene Coronavirus riba nos isla. Sinembargo, tur fin di siman ta un reto pa Polisnan por cera clubnan cu sea ta keda habri of ta gaña cera pero cu clientenan paden.
Awe marduga den careda di 2:00am Polisnan patruyando a topa varios auto pafo di Cas Casuela. Parce cu tabatin hende scondi paden, den scur, pa Polis no mira nan. A nota cu clientenan tabata sali for di porta patras, mientras cu dilanti e porta tabata cera pa mustra comosifuera cu nan no ta habri mas. Polis a laga takel un auto marca Hyundai for di e sitio.
Prome cu a bay cera Cas Casuela atrobe, a bishita Wel Wel Bar & Restaurant na Santa Cruz cu tambe tabatin un fiesta paden, aunke clientenan eyden tambe tabata scondi den scur. Tur a bandona e sitio mesora ora Polis a yega. A nota hasta cu clientenan tabata purba para nan auto leu pa Polis no ripara, pero asina mes e intentonan tabata envano.
