Pa algun dia caba autoridad na Aruba ta mandando e mensahe riba e contrabanda di gasolin procedente di Venezuela. Pa algun aña esaki ta pasando y pa algun aña tin keho riba dje. E forma di yega cu diez tanki, paga impuesto y djey bay cas chupa 20 tanki for di e tanki di e boto mes ta claramente un contrabanda pisa. Tabata burla di autoridad pa basta tempo caba. E gasolin den e tanki no tabata paga impuesto riba dje. Na Aruba tabata bende esaki barata birando un competencia inhusto pa pompnan di gasolin local cu ta cumpli cu tur ley di Aruba. Entre otro paga trahador y impuestonan. Ademas nan tabata sali dos of tres biaha pa dia bay zuid. E negoshi a bira asina lucrativo cu hasta cierto miembro di autoridad Venezolano tabata corumpi cu e negoshi. Tin biaha ni na costa Venezolano nan a yega. Ta djis yega na e awa teritorial y djey ta pasa e tankinan yen y pomp den e tanki di e boto local yena esaki pa despues bin bek Aruba. Tin varios victima cu a cay tambe pasobra ta varios boto a pega candela. Despues di varios reunion, autoridad a sera cabez pa bringa e fenomeno peligroso aki. Algun tempo pasa a laga esaki pasa pa basta luna of aña despues di un caso den corte. Awor nan a bira ta haci negoshi mas grandi cu un pomp di gasolin pero den forma clandestino. E fiesta ta bay caba awor si. Despues di vigila e movecionnan, autoridad a actua anochi laat na Sabana Grandi. A bay na un di e casnan. Autoridad uniforma di FlexTeam y tambe fiscal cu Afpak Team a presenta na e cas unda pa basta tempo e negoshi di contrabanda di Gasolin ta tuma lugar. Eynan a haci inval y confisca gasolin, boto y SUV. Un poco mas pariba a confisca tambe dos pickup cu tanki den baki yena cu algun 1000 liter di gasolin. Un golpi fuerte na un di e contrabandistanan di gasolin. E trabou lo sigui contra e grupo aki. Ta varios tin ta haci esaki y awor si cu autoridad a uni, nan lo caba cu e negoshi ilicito di gasolin. Na Venezuela tambe parce nan wowo a habri mirando cu tin hende di Aruba cu tambe a keda deteni. E gasolin di Venezuela no mag di sali for di Venezuela. E ta sali caba di contrabanda for di Venezuela. E ta gasolin pa conusmo local so mirando e prijs. Na Aruba tabata hinca algun tanki legalmente paga, pero e miles di liter den tanki di e boto tabata drenta di contrabanda. Pabien na autoridad cu e trabou aki y spera cu e otronan tene cuenta cu esaki.
