Diasabra mainta tambe tabata in un situacion cu a sosode na altura di Eagle Beach. Polisnan a wordo notifica cu tin un grupo grandi di hende cu a bebe den careda di mainta, pa mas of menos 10’or, den vecindario di e beach. Na momento cu unidad policial a pasa eybanda enberdad a mira un grupo di hende, pero despues pa evita cu e situacion a bay for di man, a pidi refuerso. A manda varios unidad na e sitio. A manda strandpolitie, polis di Noord, di Playa y di trafico, pa bin duna un man y tackle e situacion. Ora cu nan a presenta, a baha bay mesora cu esnan cu tabata riba e beach. A topa cu un paar di hende cual di nan algun ta conocido di polis y segun polis, ta e grupo di Madiki cu ta sinta dilanti Bar A Bar den e caya di Driemasterstraat. Nan tabata riba un trip. Nan no tabata molestia ningun hende, pero si polis a wordo yama pa motibo di nan presencia. Probablemente tin hende cu lo tin miedo di e hendenan caminda cu nan tabata, pesey a bati alarma. Polis a papia cu nan y a splica nan cu miho nan bay sosega. Despues di un trip pisa di anochi pa mainta y cu basta alcohol den curpa, polis a logra convence e grupo cu a dicidi cu en berdad nan ta bay nan cas. Asina poco poco, e tension y e miedo cu tabata tin den e vecindario di Eagle Beach pa motibo di e grupo aki consumiendo alcohol, a termina. Nan a bandona e sitio, a bay nan cas y sosega y no tabata tin ningun problema cu e grupo aki. No tabata tin motibo tampoco pa menasa e momento ey, pasobra nan no a resisti y no a busca problema cu ningun hende. Mas bien, nan presencia y nan trip tabata motibo di e susto cu tabata tin den e vecindario. Tur cos a caba bon durante cu polis tabata presente.
