Ta apenas algun minuut cu e parada di Oranjestad a yega final ora cu dos hende muhe a haya ta bon di start un rancament’i cabey feroz dilanti polis. Ta n’e entrada di Harbour Arena caminda tabatin un pelea p’un problema di pasado.
E dosnan a hala otro cu sla formal te ranca cabey. Pa nan mala suerte, nan no por a regla e asunto pa largo mirando cu tabatin boshi polis para dilanti Harbour Arena. Na cantidad a baha riba nan y hala nan for di otro.
A detene ambos pa bringa riba caya. Den mesun transporte policial a hiba ambos pa ward’i polis caminda a presenta ambos dilanti un subfiscal kende lo dicidi sea riba nan encarcelacion of libertad.
